Recientemente minister di Transporte Chris Romero, a reuni cu e management di Arubiana Fun Toys, kendenan ta representa un asociacion di huurdo di vehiculonan tipo UTV cu a lanta 1 luna y mei atras.
Segun e comunicado, e intencion di e reunion aki tabata pa hunto cu e companianan cu ta huur vehiculonan UTV, purba yega na un maneho integral pa loke ta huurmento di e vehiculonan aki.
E mandatario a keda satisfecho di mira e iniciativa di parti diferente compania cu ta huur vehiculo UTV pa lanta un asociacion pa asina hunto busca maneranan pa soluciona e accionnan negativo cu ta bin ta saliendo den medionan di comunicacion ultimamente. “Mi a keda contento di mira nan iniciativa pa lanta un asociacion pa purba yega na solucionnan pa cu e problematica cu ta presentando ultimamente pa cu e UTV’s, pero tambe hopi gradici di a wordo invita pa sinta cu nan pa haya splicacion di nan plannan y con nan ta funcionando actualmente”, el a sigui bisa.
“Mi por bisa cu tabata un combersacion sigur hopi positivo. Nos sa cu den e ultimo temponan tin cierto noticianan menos positivo ta sali afo cu ta involucra e vehiculonan UTV specificamente. Pa cu esaki nos a dicidi di reuni cu e asociacion di UTV aki, cu por cierto a lanta 1 luna y mei atras, pa asina hunto nos delinea un maneho poco mas consciente pa loke ta uzo di UTV den nos zonanan turistico, pero tambe cu ta zonanan di naturalesa cu ta protegi tambe”, tabata palabranan di minister Romero na final di e reunion aki.
Minister Romero a haya un splicacion amplio di e diferente tecnologianan cu e companianan cu ta forma parti di e asociacion aki ta uzando y con nan ta instrui e turistanan prome cu nan bay over na huur cualkier vehiculo nan. “Mi tabatin e oportunidad di mira con algun di e companianan aki ta funcionando. Cierto di e companianan aki ta operando na un manera sumamente responsabel y e ta algo di aplaudi y di aprecia. Mi por a mira con nan ta haci uzo, por ehempel, di GPS pa asina mantene e vehiculonan na bista tur momento. Esaki ta wordo haci pa siguridad di e mesun manehando y pasaheronan, pero tambe pa sigura cu nan no ta bay core den areanan di naturalesa cu ta prohibi pasada di cualkier vehiculo”, minister Romero a bisa.
Hunto cu ministernan di Turismo, Husticia, Infrastructura y Medio Ambiente, minister Romero ta sondeando tur posibilidad pa por bin cu cierto cambionan y regulacionnan den ley cu lo sirbi como herment pa tanto e autoridadnan competente y e companianan cu ta brinda e servicio aki, evita mas posibel pa destruccionnan na nos naturalesa di e indole aki sigui tuma luga. “Nos ta biba den un pais cu ta depende di turismo como prome pilar economico. Nos mester por mantene producto Aruba atractivo pa nos bishitantenan, pero esaki no por lubida cu nos mester proteha nos medio ambiente pasobra nos mesun turistanan ta gosa di esaki tambe”, e responsabel di e cartera di Transporte a finalisa bisando.
