Ayera un gran cantidad di maestro a asisti na e reunion cu sindicato SIMAR a convoca pa duna informacion tocante indexering.
Bale la pena remarca cu e sede di SIMAR tabata completamente yen, locual ta un refleho di e interes cu ta existi cerca e gremio di docente pa atende e tema di indexering cu gobierno. Tabata bisto tambe e presencia di e lidernan di otro sindicatonan di e sector publico, cu tambe a cera cabes pa hiba un lucha conhunto pa logra un ahuste di salario di 3.6%
Presidente di SIMAR, Josephina Albertus a cualifica e reunion aki como uno exitoso, ya cu por a mira tanto docentenan hunto cu ta vocifera cu ta ‘basta’. Albertus a calcula entre 300 pa 400 docente cu a atende e reunion aki, ayera mainta. Mientras den total tin 1,00 docente na Aruba. “E ta un bon comienso pa wak,” el a declara. Intencion ta pa mas colega docente por join na e causa aki pa ahustacion di salario.
El a bisa cu e docentenan kier pa gobierno por scucha nan. El a gradici e presencia di e representantenan di otro organisacion sindical, cu a mustra cu ‘nos no ta traha nos so, sino cu nos ta trahado uni’, el a bisa.
Igualmente na final di e reunion aki, e representantenan di e diferente sindicato, entre nan SEPPA, TOPA, SPA, SADA, a dicidi di sostene un reunion pa fiha un posicion pa e paso siguiente. Mientras tur docente presente a duna mandato caminda e siguiente paso nan tur lo t’ey pa sostene otro.
Igualmente el a laga sa cu sindicato ta dispuesto pa dialoga y scucha gobierno, pero a yega tempo pa gobierno bin cu un proposicion bek. Ya caba como sindicato nan a bin cu un proposicion di 3.6 di ahuste, y nan ta wardando un contra proposicion. P’esey SIMAR ta pidi claridad di parti di gobierno pa ora cu nan tin cu bay cerca e maestronan, ‘nos tin algo pa bisa nan.’
