Mañan Parlamento di Aruba lo trata e ley di “All Inclusive” cu a lanta hopi controversia particularmente entre e sector hotelero representa pa Ahata y minister di Turismo, sr. Otmar Oduber. E debate ta wordo centralisa riba beneficio of no beneficio pa nos industria hotelero cu e proposicion di ley por trece cun’e. Despues di tur e dianan di discusion rond di e topico aki, minister Oduber a declara na Bon Dia Aruba cu e ta convenci di e necesidad di e ley aki.
Durante e siman aki el a atende e reunion pa loke ta trata “sharing economy” cu ta e tendencia mundial, y cu Aruba a cuminsa experiencia riba e parti di hospedahe. E ta kere cu “sharing economy” ta algo masha normal den economia caminda bo ta depende hopi di turismo. “Crea oportunidad pa mas hende posibel participa den industria y beneficio cu turismo ta bin cune”. E mandatario a indica cu esey lo ta e enfoke pa e proximo añanan .
Otro acomodacion y regulacion
E ta haya cu e ley di “All Inclusive” ta importante pa e regulacion, ya cu nan ta bay incorpora den maneho di gobierno tur acomodacion cu ta bay cumpli cu e ley aki.
El a reitera cu destinacion Aruba no ta depende unicamente riba hotelnan. Aunke nan ta un factor hopi importante pero mester tene cuenta tambe cu e otro acomodacionnan cu ta forma parti entre un 15 y 20% di e totalidad di acomodacion di bishitantenan. E ta nifica e di cinco parti di nos capacidad di huesped na Aruba ta den man di otro instancia cu no ta hotelnan . “Bo mester percura cu bo maneho ta incorpora nan y bo tin cu percura pa bo tin reglanan pa esey”, el a declara na e matutino aki.
El a indica cu e tipo di alocacion cu ta hayando forma y cu no necesariamente mester ta hotel, tambe lo cay bou e regulacion di e proposicion di ley cu lo wordo trata den seno di Parlamento. Encuanto si el a reflexiona riba su cambionan den e ley aki, e mandatario a bisa na Bon Dia Aruba cu netamente e ley aki ta acapara pa por reglamenta e otro tipo di acomodacion. El a indica cu esaki ta un di e aspecto cu ta wordo lubida den e discusion cu ta tuma luga den medio di comunicacion y cu ta wordo fomenta dor di Ahata y su miembronan , y cu e ta haya cu ta logico cu nan ta defende nan interes. E ta agrega cu niun otro sector practicamente no ta papia di e ley aki, sino Ahata cu tin interes personal naturalmente den e ley aki.
E ta haya cu un aspecto cu ta wordo discuti den henter e discusion aki ta cu e propio ley aki ta “bay reglamenta, regula y ta bay pone exigencianan pa tur e acomodacionnan cu tin pafo di e hotelnan na Aruba sea cu ta condominio, cas, apartamentonan”. El a manifesta cu e tipo di acomodacion aki cu nan tambe ta bay cumpli cu e mesun reglanan cu e hotelnan tin pa loke ta trata e permiso. Kiermen cu nan mester tin e permiso necesario y nan mester cumpli cu nan obligacion y asina crea un nivel di competencia mas husto cu e hotelnan. Unabes cu e tipo di acomodacion aki ta bay pidi permiso pa funciona conforme ley cu ta bay start pa e camber di all inclusive tambe, nan tur lo wordo reglamenta.
