Arulex Trust Service di bufete Croes Wever Ruiz ta representa; Lago Colony Beach Club cu restaurant, tienda y hasta watersports na Baby Beach

Oficina di Abogado Hendrik Croes ta e cara di proyecto Lago Colony Beach Club. Potretnan di e registro di Camara di Comercio di e compania aki a keda reparti den rednan social.  E VBA ta representa pa Arulex Trust Service como Director y Arulex Trust Service tin como directornan, abogadonan cu ta traha den e oficina di Croes-Wever-Ruiz, esta mr. Anthony Ruiz, mr Abilene Croes-Thijsen, mr Celina Wever, y mr Iris Wever.

Arulex Trust

E obhetivonan di Arulex Trust Service ta representa y maneha interes di terceronan, den e sentido mas amplio posibel, como tambe cu obhetivonan specifico. Manera maneha, dirigi, administra propiedadnan, actua como dirigente, y fungi como e instancia apunta (gemachtigde), duna conseho riba inversion di fondonan, fungi como mediado pa funda otro companianan.

Watersports

E obhetivonan di Lago Colony Beach Club te cu ayera no tabata riba e registro di Camara di Comercio. Segun un vocero, motibo ta cu e tabata na Ingles. A manda obhetivo di e compania pa Bon Dia Aruba, sinembargo. E establecimento, cu su adres na Seroe Colorad 245-E, San NIcolas Zuid (Baby Beach), tin como meta pa maneha un of mas cafe, restaurant y/of bar. Lo ofrece cuminda, tur tipo di bebida y tambe lo organiza catering y servicio di catering.

Kizas locual ta yama mas atencion ta cu e intencion ta pa opera actividadnan di watersports, unda lo huur y/of bende ekiponan pa snorkel y duik, pero tambe organiza excursion, tours y mas. Mester corda con Minister di Turismo Dangui Oduber a anuncia e construccion di un pier nobo na Rodgers Beach.

Hypoteca

Banda di e actividadnan, e compania lo tin tienda di paña y otro articulo pa beach, souvenirs.

Segun su obhetivonan, Lago Colony Beach Club lo opera bou e areglo general di negoshi na Aruba, pero banda di actividadnan di negoshinan ‘retail,’ tambe tin obhetivo pa maneha y huur propiedadnan y hasta extende prestamonan di hipoteca, aunke no den e sentido cu e ta bira un institucion di credito den e sentido amplio. Tur e actividadnan aki lo sosode bou e regimen di  y cumpliendo cu leynan di Aruba.

Ken exactamente ta e doñonan di Lago Colony Beach Club en todo caso  no ta conoci, y no ta sigur si nan lo bira conoci, mirando cu ta Arulex Trust Service ta actua como nan representante.