Varios factor di riesgo pa trafico; Situacion di infrastructura mal traha ta trece peliger den trafico

Diabierna 7 di augustus un accidente cu shete persona levemente herida a tuma luga dilanti di Feng Wei Supermarket riba Avenida Milo Croes. Ya den pasado varios accidente di diferente caliber a tuma luga den e area aki. Lamentablemente e lo sigui sosode, si no lo bin cu un pronto solucion pa evita nan.

Pero tambe tin diferente situacion cu ta wordo presenta, manera falta di señal di trafico, borchi mal poni, situacion di infrastructura mal traha, falta di iluminacion, falta di mas programa di educacion y conscientisacion ta pone nos trafico na peliger.

Situacion

Segun un experto den trafico cu Bon Dia Aruba a consulta, berdaderamente den e area dilanti di Van Dorp Book & Office y Feng Wei Supermarket, tin varios factor di riesgo pa trafico.

Un factor cu ta hunga un rol ta e sistema di staciona riba tur dos banda di caminda. Alomenos mester a construi nan di un forma cu ta resulta mas facil pa sali riba un caminda smal manera Avenida Milo Croes. E ta preferibel den e situacion aki pa autonan staciona horizontal. Logicamente e sitio di parkeer ta bira mas reduci, pero si mas sigur.

E mester ta poni den un direccion manera ta poni dilanti di Centro di Desaroyo di Hende Muhe (CEDEHM) y Bureau Traimerdia. E chauffeur ta yega sali stret su dilanti. Sinembargo esun cu por resulta peligroso ta esun cu bo mester parkeer bo auto vertical y schuin, caminda bo no tin bon bista ora bo ta reverse bo auto pa sali. Pa atende cu esaki mester a cambia full e infrastructura di e parkeer aki. E mester wordo poni horizontal manera a wordo poni otro banda di caminda, pero cara pabao. Ora bo ta sali e ta facilita tur cos, solamente bo mester wak bo spiel y sali bay.

Tambe bo ta haya e situacion di un T-Weg entre Stadionplein y Avenida Milo Croes. Hopi biaha dor di cu e caya ta smal, e trafico cu ta bay pariba no tin mucho problema, pasobra tin un miho bista. Pero esun cu ta bay pabou, mester tene cuenta cu dos trafico. Ta preferibel pa guia e fluho di trafico caminda absolutamente bo no mester pasa over den dos caminda pa evita e situacion peligroso aki. E ta haci e fluho di trafico mas sigur. Anochi tin factor cu e ta bira mas peligroso ainda debi na falta di iluminacion. E hecho cu bo mester pasa over den dos caminda e ta hacie mas peligroso ainda.

P’esey ta importante pa haci e fluho di trafico miho den un direccion posibel, specialmente den area di Playa, ya cu e camindanan ta smal. Esaki ta un trabao cu departamento di Planificacion hunto cu DOW mester studia y evalua e situacion aki, ya cu nan ta esunnan responsabel di esey.

Antes polis tabatin mas participacion, pero lamentablemente nan a perde bos den e tuma di decision den e construccion di caminda. Un polis veterano riba e tereno aki a yega di bisa cu antes bo no por pone un feneta riba caminda, sin consulta cu expertonan di polis y sin aprobacion di polis. E veterano aki ta mira cu desde cu e cambio a bini, e situacion a deteriora, y esaki ta e resultado cu nos ta haya situacion di peliger den trafico, manera esun riba Avenida Milo Croes.

Otro factor tin di haci cu tin un tendencia cu e chauffeur cu ta parkeer su auto schuin y vertical, ora cu ta reverse pa sali, nan ta supone cu e trafico cu ta biniendo riba caminda ta para pa duna bo un chens, y esaki por causa accidente. Hopi hende ta prefera lastra brake y no uza pito. Mientras cu pito ta un instrumento cu ley ta duna bo pa alerta un hende riba peliger eminente. Hopi hende no ta uza pito, pasobra den nos cultura, ora bo ta uza pito ta manera bo ta insulta un hende.

Otro factor ta e falta di señal den trafico y muy specialmente pintura riba caminda cu ta yuda hopi pa trafico sigur. Hopi di e pintura a bay den e area aki. Un instrumento cu tambe por yuda ta e uzo di spiel, vooral si e bista no ta mucho bon. Otro instrumento ta e uzo di polis drumi, unda bo ta forsa esun tras di stuur pa baha velocidad. Nan ta elementonan contempla den nos ley di trafico. Nan t’ey, pero mester uza nan pa trece mas siguridad den e area aki cu tin hopi accidente.

Igualmente e tipo di programa di conscientisacion di trafico cu ta algo obligatorio hinca den ley pa alerta riba e areanan di accidente, ta yuda. E specialistanan den trafico ta duna splicacion pa alerta tur automobilista. Mester inculca mas conocemento pa loke ta regarda e reglanan di trafico, segun e persona consulta.

Borchi nobo

Igualmente tin parti caminda mester educa nos automobilistanan ya cu ley di trafico ta cambia. Por ehempel tin borchi nobo ta bin tambe. Pero tambe e scol di conduci (rijschool) ta hunga un rol fundamental den esaki. Hopi di nos no sa cu aña pasa a bin 9 borchi di trafico nobo. E pregunta ta, cuanto di e conductornan cu tin rijbewijs sa e nificacion di e borchinan nobo?

Ainda tin un par di borchi nobo na caminda cu ta pega na Parlamento, y cu mester bin pa yuda guia nos trafico y trece siguridad riba nos careteranan. Ya cu e falta di nan ta contribui pa crea un situacion peligroso. Ki bal cu ora bo bay un scol di conduci nan ta siña bo manera ley di trafico ta prescribi, pero ora bo ta subi riba caminda, bo ta haya cu construccion incorecto, pintura incorecto y borchi incorecto poni, locual ta trece confusion.

Aruba su infrastructura a cambia caminda nos tin hopi cos nobo. Un di nan ta e parti di tantisimo rotonde construi. Hunto cu e articulo aki tin situacion cu nos ta ilustra riba borchi mal poni y cu finalmente a wordo drecha.