Parlamentario Jennifer Arends-Reyes (AVP): Mundo di Enseñansa te ainda 3 siman prome cu eleccion no tin trankilidad

Segun Parlamentario Jennifer Arends-Reyes te ainda e trankilidad cu mester tin den Enseñansa pa e docentenan y alumnonan por cuminsa cera aña escolar no t’ey. Tin hopi pregunta ainda y insiguridad bao di esnan cu ta resortando bao di e Ministerio di Enseñansa.

Hopi ta esnan cu ta den servicio di limpiesa na scolnan cu tin un contract cu ta cabando hunto cu e fecha di eleccion. Igual ta e caso pa esnan cu ta dunando landamento escolar. Despues cu a traha alma y cuerpo pa añanan largo yuda e proceso escolar awor tin cu biba cu nan ta na merced di decisionnan di un siguiente gobierno.

Ta hopi tristo cu te ainda decisionnan ta ser tuma, a comprende cu tin personanan ta wordo apunta na diferente departamentonan cu funcionnan halto y procesonan di seleccion pa rectorado ta den full swing.

Dienst Publieke Scholen atrobe tin cambio den management pa di 6-7 biaha cu e gobierno ta na mando. Cartanan ta sali pa scolnan cu plannan cu de facto a wordo para pa Parlamento ta continua y e mayornan simplemente ta wordo informa y asina por sigui menciona. Un baño di awa friu pa mayornan tabata ta cu schoolgeld pa scolnan catolico a aumenta cu 75,- fls pa mucha siendo cu gobierno di signatura geel a campaña semper cu nan lo kita schoolgeld. E aumento aki ta debi na recortenan grandi den Enseñansa y cambionan den vision y maneho pa cu Enseñansa.

IPA e instituto mas grandi den formacion di maestronan en bes di wordo fortifica y sondea e posibilidad di bira un facultad di Enseñansa hunto cu esnan trahando eynan, a duna permiso pa habri un competencia directo pa IPA cu yama APA. E scolnan preparatorio ta hayando nan mes den gastonan grandi y pregunta con nan lo mester implementa e proyecto di SAM Scol Multilingual Arubano optimalmente, cu a desaroya material online siendo cu falta basta scol cu no tin e infrastructura y of digibord pa implemente pa aña escolar nobo.

Basicamente tin hopi pregunta y incertidumbre ta reina te na final ainda den e sector di Enseñansa y esaki tin hopi mayor, alumno y maestro sumamente preocupa.

Eleccion ta cerca y ainda cambionan drastico ta pasando, e gobierno di MEP-POR-RED a firma un landspakket hopi rigido pa Aruba, cu lo tin consecuencianan drastico pa Aruba, poder di compra y mas ainda lo tarda hopi prome cu Aruba lo por haya ayudo of alivio pa inversionnan grandi den Enseñansa si no renegocia bon back cu Hulanda. Cu recortenan di 25 miyon pa aña cu ta casi un 10% di e presupuesto total si nos Enseñansa lo keda sufri y bay atras.

Enseñansa ta un cartera sumamente importante y crucial den e desaroyo y restauracion di nos isla. E maestronan y mayornan kier wak cambio, seriedad y accion den e cartera di Enseñansa. Na man di e ultimo gobernacion aki no tabata tin pas laboral ni trankilidad den curason den esnan cu ta sirbi nos pueblo nos generacionnan siguiente y cu tin e tarea pa forma nos lidernan di mañan.

E cuido y trato pa tanto pa alumno, studiante, maestro y docente mester cambia pa miho urgentemente Sra. Arends-Reyes kende su experticio primordial ta keda Enseñansa ta termina bisando.