Ta exigi 42 luna di prizon pa sospechoso gara sunu cu mucha menor di edad

Diahuebs mainta e persona cu a wordo deteni aña pasa na Piedra Plat relaciona cu abuso di un mucha mester a presenta den corte. Segun Ministerio Publico, e ta wordo acusa di tene relacion sexual cu un mucha di 14 aña y ta exigi un castigo di 42 luna pe. E fecha pa locual ta veredicto di e caso ta bay wordo anuncia pronto.

E caso
Dialuna anochi 10 di October 2016, patruya di St. Cruz a tuma nota di un auto bahando e cero na Seroe Cristal cu no kier a para pa Polis ora a dun’e señal. A inicia un persecucion pidiendo pa mas Polis anto logra para e vehiculo den cura di Veld di Britania na Piedra Plat. Akinan Polis a blokia e vehiculo anto bay na e auto topa cu un homber sunu y un mucha menor di edad cu tabata tur spanta. A resulta cu e mucha muhe ta su yiu di criansa. A notifica recherche di e caso aki dibiaha anto e homber a keda deteni.