Prome Minister Evelyn Wever-Croes diahuebs 9 di juni a reuni cu representantenan di Hulanda señor Erwin Arkenbout y señor David Abrahams. E tipo di reunionnan aki, Prome Minister a duna di conoce, ta reunionnan cu ta tuma luga regularmente pa delibera riba diferente tema di relevancia.
Prome Minister a enfatisa cu pa Gobierno di Aruba ta hopi importante pa traha riba un bon relacion den Reino a base di respet mutuo y madurez. Esaki kiermen cu Gobierno no ta bay bati na porta di Hulanda pa cualkier detaye cu no ta mucho relevante. Aruba mester atende cu madurez su propio asuntonan. Y den caso cu esaki no ta posibel manera den e caso di Covid, por acudi na Hulanda pa ayudo.
Aruba ta den recuperacion. Prome Minister a comparti cu nan pa kico Aruba a haci como Gobierno y comunidad pa yega na e recuperacion y con e recuperacion ta bayendo actualmente. “Semper mi ta sinti mi orguyoso con como un pais, nos a bin hunto pa saca e pais aki padilanti”.
Un otro tema cu a haya atencion tabata e reunion hopi importante di dia 20 di juni proximo na unda cu Aruba lo ta e sede di dje. Riba e fecha aki lo reuni hunto Prome Minister di Aruba, Prome Minister di Corsou, señor Gilmar ‘Pik’ Pisas, Prome Minister di Sint Maarten señora Silveria Jacobs y Secretario di Estado, señora Alexandra van Huffelen. Den e reunion aki lo trata e ley di Consenso di COHO. Un dia prome, esta dia 19 di juni, lo atende e ley di Consenso Raft.
“Un reunion hopi importante na unda cu lo bay defini con lo continua cu e leynan di consenso aki teniendo cuenta cu e preguntanan cu Parlamentonan di Reino a haci y tambe con pa tene cuenta mas tanto posibel cu e preocupacionnan cu a wordo expresa pa e Parlamentonan di Aruba, Corsou, Sint Maarten y di Hulanda”, Prome Minister a duna di conoce.
