(NLTimes)—Un scol primario na Amsterdam-Zuid a dicidi pa cera su porta diahuebs mainta despues di un menasa envolviendo e scol riba Snapchat. Esaki ta e segunda scol pa cera e siman aki despues di a bira e obhetivo di un menasa violento riba e servicio di mensahe. Polis a detene un mucha di 14 aña diaranson pa publica e menasa aki contra un scol secundario.
De Notenkraker, e scol primario riba Theophile de Bockstraat na Amsterdam-Zuid a informa mayornan diamars mainta tocante e situacion. E scol a dicidi pa keda cera mientras cu investigacion ta determina e legitimidad di e menasa, cual a ser distribui e anochi prome riba Snapchat. E decision pa cera ta “pa e seguridad di e muchanan y empleadonan,” segun lider di e scol Antoinette van Zalinge a skirbi den su carta.
“Ainda nos no a haya ningun siguransa for di polis pa con pa interpreta esaki,” e scol a skirbi den un memo pa e mayornan. Parti di e investigacion tabata pa determina si e incidente tabata un copia di un otro menasa haci contra un scol secundario e siman aki, of di un incidente den e area den pasado.
Mientras tanto, polis na Amsterdam a detene un residente di 14 aña pa menasa relata na un posibel tiramento na un scol secundario na Amstedam-Oost. E menasa a causa e cabesante di e scol, Spinoza20first, pa cera e facilidad diaranson, y pa pospone examen. Un bes cu a anuncia e detencion, e scol a cancela plannan pa keda cera diahuebs.
E menasa a bira “viral” riba Snapchat diamars anochi. Esaki tabata bisa: “Spinoza shooting tomorrow?? Watch out for people in spinoza20first!!” E publicacion aki tambe a specifica un orario di 1or pa 2or di atardi.
“Investigadonan a cuminsa un investigacion despues cu nan a ricibi un reportahe di menasa diamars anochi, dia 23 di mei,” polis a señala. “E sospechoso menos di edad ta den detencion y e investigacion ainda ta andando.”
“Bo nunca sa sigur si un hende cu ta den detencion en berdad ta e agresor, pero segun polis, esaki ta un hende cu tin conexion cercano cu e situacion,” segun Jan Paul Beekman, cabesante di Spinoza20first.
E scol ta localisa riba H.J.E. Wenckebachweg. Beekman a conta AT5 cu e scol ta bay habri atrobe diahuebs. Den principio, e scol a anuncia cu e ta bay keda cera un segunda dia mientras cu investigacion ta andando. Un bes cu a haci detencion, e directiva di e scol tabatin duda pa habri diahuebs, considerando e inkietud cu e menasa a causa.
“Awo cu nos a crea un balans, ta importante ainda pa nos ta habri pa studiante y cu nan por fisicamente bay scol. Nos ta alerta, pero nos ta mas preocupa tocante e impacto cu esaki tin riba e muchanan; nan y nos coleganan ta bin prome. P’esey nos no ta bay cuminsa les mesora, pasobra nos kier sa prome con tur hende ta,” Beekman a bisa.
Plannan pa move cursonan online y relocalisa examen pa un scol secundario na Amsterdam-Zuid a wordo cancela.
