(USAToday)—A detecta un variante nobo di Covid-19 yama FLiRT den monitorio di awa di riool, segun data for di e Centro di Control y Prevencion di Malesa Mericano (CDC).
For di dia 14 di april te 27 di april, e variante, cual a haya e label KP.2, ta conta pa 25 porciento di e casonan na Merca, segun CDC. Esey ta haci’e e variante dominante nobo den e pais, tumando over JN.1. E variante JN.1, cual a plama globalmente fin di aña pasa, a conta pa 22 porciento di e casonan di Covid-19 na Merca den e mesun periodo di dos siman.
KP.1.1, un otro variante FLiRT cu ta circulando, a conta pa 7.4% di e casonan di Covid-19 den e periodo di dos siman, segun data di CDC.
Megan L. Ranney, rector di e Yale School of Public Health, a conta WebMD cu FLiRT tin algun caracteristicanan preocupante, manera cambionan den e proteina spike, cual ta hunga un rol den yuda SARS-CoV-2 colonisa e curpa y haci hende malo.
Segun CDC, solamente 22.6 porciento di adulto a reporta di a haya un vacuna contra Covid-19 di 2023/2024 desde september 2023. Data tambe ta mustra cu e cubrimento di vacuna a aumenta pa edad y tabata mas halto entre adultonan di 75 aña bay ariba.
“Nos tin un poblacion di hende cu inmunidad debilitando, cual ta aumenta nos vulnerabilidad pa un ola nobo,” segun Thomas A. Russo, hefe di malesa contagioso na e Jacobs Schools of Medicine and Biomedical Sciences na e Universidad di Buffalo, a conta WebMD.
USA TODAY a tuma contacto cu CDC pa mas informacion riba e variante FLiRT pero no a tende nada back ainda.
Sintomanan di e variante FLiRT
Ta parce cu e variante FLiRT tin mesun sintomanan cu e variante JN.1, cual ta inclui:
Keintura of calafriu
Tosamento
Dolor di garganta
Congestion
Dolor di cabes
Dolor di musculo
Dificultad pa hala rosea
Cansancio
Perdida di sentido olfato y gusto
“Brain fog” (sinti menos lanta y consciente)
Sintomanan gastrointestinal (stoma bira, diarea, sacamento)
CDC ta nota cu e lista no ta inclui tur posible sintoma y cu sintomanan por cambia cu variantenan nobo y por varia den cada hende. En general, e agencia a bisa, hende cu Covid-19 tin un variedad di sintomanan, variando for di leve pa severo malestar. Sintomanan por aparece dos te cu 14 dia despues di prome contacto.
