Ayera atardi, minister di Finanzas y Cultura Xiomara Maduro a duna un conferencia di prensa pa trece dilanti mas informacion tocante Finanzas publico unda el a papia di subsidio di salario y recorte di companianan estatal.

El a señala cu ta importante pa comunidad sa cu Parlamento di Aruba den un reunion publico di siman pasa a legalisa lo cual ta e subsidio aki cu a wordo duna na comercio pa asina por enfrenta y surpasa e pandemia di Covid-19 cu fondo di likides di Hulanda pa por mantene e cuponan di trabao.

Na aña 2020, a duna 271.1 miyon florin y na aña 2021 a duna 151.7 miyon florin, un total di 422.8 miyon di yudansa den forma di subsidio di salario, manera e mandatario a indica.

A keda conoci cu e yudansa aki a yega na su fin na luna di november di manera abrupto segun loke comercio mes a indica pero tambe e ta na su luga segun minister Maduro, pa motibo cu Aruba mes a keda pendiente di Hulanda, caminda nan a pidi e fondonan necesario pa por brinda e asistencia aki pero den ultimo kwartaal di 2021 Aruba no a haya e fondonan aki ainda, “nos no tabata como Aruba tampoco riba lo cual ta e ultimo reunion di conseho di minister di reino e cual tabata 26 di november ultimo y p’esey e ora ey nunca a bin un decision for di Rijksministerraad cu nos no ta haya e fondo aki, pero e tempo a pasa tambe y Aruba no a haya e fondo, y sin e fondo gobierno lamentablemente no por brinda lo cual ta bira e sosten aki”.

Di otro banda e consehonan di CAft a bini pa e ora ey stop e subsidio di salario pa motibo cu Aruba lo drenta den un temporada halto, cu economia ta creciendo “y esaki tambe ta berdad, Aruba ta bayendo den hopi bon direccion”, el a declara.

Durante e reunion publico tambe a trece dilanti un preocupacion pa loke ta trata e cobransa di subsidio di salario, cu segun el a expresa tabata un regalo pa comercio por a tene nan cuponan di trabao cu tabatin su condicionnan y un di nan tabata cu nan mester por a demostra cu nan a bay atras den nan entrada pa mas cu 25%.

CAft tambe a solicita un control necesario pa wak si di berdad e subsidio cu a wordo duna a cumpli cu tur e reglanan lo cual a bira un investigacion cu a keda cla na unda cu a keda conoci cu tin 72.9 miyon florin cu a wordo duna di mas pa lo cual ta subsidio di salario y aworaki ta bay haci e cobransa.

Lo cual tabata e promedio cu e hende a perde na benta den aña 2020 door di e pandemia, a yega casi na 50%, 48.4% ta e promedio di lo cual e companianan a cay den benta, ademas di esey minister Maduro a splica cu un grafico kico ta e sumanan cu mester wordo cobra y kico e companianan a indica, por ehemplo, pa algun di nan tin cu cobra entre 500.000 pa un miyon florin, na unda e compania a bisa cu nan a perde 100% pero di otro banda e cifra real tabata 99.6%, tambe tin otronan cu tin cu paga mas un di un miyon florin pa motibo cu su perdida tabata di 41.2% y no 100%. Esaki lo wordo cobra door di SVb.

Den un otro grafico, minister Maduro a señala ki tipo di companianan tin cu paga e sumanan aki, por ehemplo, Accommodation and Food Services Activities di e cual cu tin cobra 16.3 miyon florin cerca nan y despues ta sigui pa e companianan di Wholesale, Retail trade, repair of motor vehicles and motorcycles cu 14.7 miyon florin, Administrative and support services activities 8.6 miyon florin entre otronan cu un total di 72.9 miyon florin.

Ta importante pa bisa cu e cobransa aki lo wordo haci conforme e capacidad di pago di e compania, na unda cu tin companianan cu pandemia a afecta hopi pero lo tin consideracion cu nan segun minister Maduro a indica y cu SVb tin un maneho cu ta wordo stipula pa e cobransa, “den dianan nos dilanti lo bay duna mas informacion, SVb lo ta acercando e companianan caba riba e parti aki”, el a bisa.

Minister Maduro a menciona cu den CAft su conseho di 24 di november ultimo nan a pidi Gobierno di Aruba pa asina reporta tur kwartaal den e Uitvoerinsgrapportage (URK) pa asina indica con ta cobrando e placa aki, na unda cu nan tambe a pidi gobierno pa integra esey den caha di administracion di pais Aruba.

“Esaki cu e meta pa entre otro, pa baha e deficit di pais Aruba” Maduro a manifesta.

Dia 29 di november, CAft tambe a manda un conseho na unda ta pidi gobierno riba concepto di aña 2022pa traha areglo di pago pa esunnan cu mester debolbe e placa di subsidio di salario y tambe pa caba di ehecuta e control di aña 2021 prome cu 1 di april 2022.

Tambe, el a sigura cu presupuesto 2022 a cana su caminda na unda cu a caba di haya su conseho di CAft y aworaki Raad van Advies tin cu tuma su tempo pa duna su conseho pa gobierno por haci cambionan necesario pa despues por bay Parlamento di Aruba pa su tratamento.