Director di SVB ta sigura cu decreto ministerial riba e subsidio y FASE a anticipa e ley

Tur dunado di trabao a haya notificacion ayera cu a base di e ley cu a pasa Parlamento, a formalisa e autoridad di SVB pa por cobra locual a paga di mas na subsidio salarial. Ta trata e ley Subsidio Salarial Temporario.

SVB tin tur informacion di Servicio di Impuesto riba e cifranan definitivo di 2021 pa asina por saca afo cua compania a haya subsidio salarial di mas y cua a haya menos. Manera ta conoci, a determina caba cu na 2020, companianan a ricibi casi 73 miyon florin di mas na loonsubsidie, y segun Director di SVB ir. Edwin Jacobs, MSc, awor ta concluyendo e calculacionnan pa 2021.

Mientrastanto e ley riba subsidio salarial a pasa.

Awor cu e ley a pasa a bin e instrumentonan pa cobra y SVB lo ta riba caya pa cobra. Pero locual e ley no ta regla ta e forma con pa cobra. SVB ta dispuesto pa yega na areglo cu companianan cu mester paga back, pa percura cu nan lo no kibra. “Pero no por exclui cu algun compania lo kibra, ya cu algun ya prome cu pandemia tabata luchando pa sobrevivi. E subsidio di salario a duna nan un oxigeno pa un tempo.”

Areglo di pago

Pero ta tene cuenta si cu e capacidad di pago di e companianan y den su carta na dunadonan di trabao, Jacobs ta informa cu tur dunado di trabao cu a ricibi cobranza pa paga back locual a ricibi di mas na subsidio salarial, lo ricibi un carta pa recorda e pago specifica. Ta invita dunadonan di trabao pa denter di 10 dia despues di ricibi e carta cu a sali ayera, pa sea paga of yega na areglo di pago. Den caso cu no bin reaccion, SVB lo manda carta recordatorio (aanmaning) unda un biaha mas ta brinda e oportunidad pa paga of cera un areglo di pago, denter 10 dia despues di e di dos carta aki. Pero si en caso e dunado di trabao keda sin reacciona, SVB lo manda un ‘dwangschrift’ pa sea paga den tres dia di trabao of yega na un areglo di pago. Si e dunado di trabao no cumpli cu e instruccion di deurwaarder, e funcionario aki lo mester pone embargo riba e compania.

“Pero SVB ta spera cu no mester yega asina leu, y como tal ta urgi companianan cu tin un debe di subsidio salarial, pa tuma contacto cu e departamento di cobranza di SVB pa haya informacion riba e debe, forma di pago of yega na un areglo di pago,” ir. Jacobs a bisa den su carta, cu el a firma na number di Minister di Finanzas y Cultura.

Por cobra retroactivo

Bon Dia Aruba a tuma contacto cu ATIA pa mira con su miembronan a tuma e carta y segun e Director Herrick Henriquez, ta bay tin reaccion riba e decision aki. Particularmente pa motibo cu diferente hurista a informa entre otro Bon Dia Aruba cu berdad por duna un ley un forsa retroactivo manera ta e caso cu e Ley Subsidio Salarial temporal. Pero, unicamente si e provisionnan den e ley ta na beneficio di comunidad. No por pone provisionnan cu ta trece peso riba e ciudadano cu forsa retroactivo. E hecho cu kier pa companianan paga back e subsidio salarial di ricibi, no ta na beneficio di e companianan aki cu ta persona huridico. Riba dje, ya caba a haci pagonan di loonbelasting y pago di primanan social riba e sumanan ricibi. “E trahadonan cu si a haya e placa mester a firma, toch? Dus riba lomba di ken ta bay cobra e placa back?” ta e pregunta cu a haci.

E problema cu por lanta cabez pa Gobierno cobra a base di un ley cu ta traha cu forsa retroactivo, ta cu a presenta e ley mucho laat na Parlamento. For di mita di 2020 a avisa Gobierno cu tardanza cu formalisacion di loonsubsidie y FASE por crea problema. Pues ta preocupante cu a haci tur e gastonan di subsidio salarial y FASE sin un areglo legal adecuado.

Decreto ministerial ta bisa cu por cobra back

Reaccion di Director di SVB riba e ponencia aki ta sinembargo cu e ley no tin ningun provision adicional cu no tabata den e decreto ministerial caba. E ley nobo ta cubri e partinan aki. “E decreto Ministerial a bisa cu lo cobra back locual a ricibi sin derecho. E asunto aki a keda studia pa huristanan legislativo y el a pasa e evaluacion critico. Pero naturalmente un dunador di trabao por pidi Corte pa evalua e ley. Esey ta su derecho,” tabata e observacion di e Director di SVB ir. Edwin Jacobs, MSc.

Mandato

Mas ainda, e Landsverordening Instelling Ministers nobo, esta e LIM ainda no a pasa Parlamento, cu ta nifica cu mester traha segun e ley actual, a base di mandato. E Minister di Finanzas, Asuntonan Economia y Cultura ta keda e persona encarga cu SVB y no e Minister di Finanzas y Cultura, cu ta e mesun Minister, esta mr. Xiomara Maduro. Segun Jacobs, entre tanto a coregi e ‘mandatering’ pero cu esey no ta kita afo cu SVB tin e mandato caba conforme ley pa cobra back.

Mas trahado inscribi

Locual si ta un bon noticia di SVB cu e cantidad di empleadonan inscribi na SVB ta sigui e tendencia di crecemento. Atrobe a mira un aumento di e cantidad na luna di November compara cu October di e aña aki. Remarcabel ta si cu e cantidad di dunado di trabao a aumenta. Segun Jacobs, e pandemia a crea espacio pa mas compania nobo lanta. “Semper tin hende cu ta mira espacio den un crisis pa haci negoshi. Pero tin otro cu simplemente no por sigui den e crisis, pues nan ta bay cay.” Den concepto di Jacobs, subsidio salarial a tene e companianan aki na bida den forma artificial, pero awor cu e subsidio a para, nan no tin e espacio pa por a restructura nan finanzas y gasto, cu consecuencia cu nan lo cay,” ir. Jacobs a bisa Bon Dia Aruba.