Asina a informa minister di Asuntonan Social y Husticia, Rocco Tjon ken riba su pagina di Facebook a publica un video mustrando e acuerdo aki. El a splica cu tambe nan a firma un acuerdo entre Pais Aruba, AZV y Stichting Eliezer cu ta bay hunga un rol sumamente importante den e cuido cu ta brinda na e clientenan aki.
Esaki tin e obhetivo manera el a sigura, di tin un miho structuracion di cuido di salud mental na Aruba pero banda di esey e stuurgroep ta bay tin un rol pa keda monitoria cu e cuido cu ta wordo brinda ta e cuido adecua. Tambe tin otro diferente grupo di trabou cu ta traha riba ehecucion di e roadmap cu tin pa loke ta salud mental na Aruba.
“Nos tin diferente building blocks cu ta toca tur diferente aspecto pa loke ta trata cuido, specificamente salud mental pa asina nan atende e parti di tecnologia, financiamento di e cuido ak,i pero hopi importante tambe e health work force y e health information” el a bisa.
Den e acuerdo entre Bureau Rampen Bestrijding Aruba cu AZV nan ta bay cambia e manera con antes e langdurige klinishe GGZ tabata wordo brinda caminda nan ta bay crea e condicionnan pa loke nan ta conoce como e beschermd wonen, un cuido cu profesionalnan mes ta indica cu ta mas na su luga pa e clientenan aki mirando cu e comision a indica cu e pashentnan aki tin un indicacion social.
“E cuido cu ta bay wordo brinda ta bay ta mucho mas miho pa e clientenan aki”, minister Tjon a expresa.
Algun luna atras a bira conoci e noticia di e ciere di verblijfsafdeling di Respaldo loke a causa un conmocion den comunidad y nan como gobierno, segun el a bisa, a indica cu nan lo laga esaki sosode solamente na un manera responsabel y esey ta e motibo dicon e diferente grupo di trabou a bay percura pa yega na un solucion na corto plaso e cual a wordo firma ayera mientras nan ta traha riba e solucion pa largo plaso.
Di esaki, el a splica cu nan ta bay haci posibel pa e pashentnan cu tabata na verblijfsafdeling di Respaldo ta bay wordo ubica na Stichting Elizier, banda di esey, e fondonan necesario a traves di AZV ta bay wordo aloca tambe pa por crea e condicionnan adecua teniendo na cuenta e parti di siguridad y di cuido.
Cu esaki, el a trece dilanti cu ta bay tin un inversion di cerca di 776.000 florin pa por brinda e cuido adecua pa e clientenan aki.
Manera Bon Dia Aruba a publica dia 14 di october ultimo, Verblijfsafdeling di Respaldo a cera for di dia 1 di november. Pa mas informacion bishita https://www.bondia.com/entrante-1-di-november-afdeling-verblijf-di-fundacion-respaldo-ta-cera/
