Fundacion Animal Welfare Alliance Aruba (AWAA) ta un fundacion nobo cu a word funda e aña aki den luna di juni. E fundacion a keda estableci pa representantenan di otro fundacionnan cu ta traha pa bienestar di bestia riba caya y tin como meta yuda cu e problematica grandi na Aruba di bestiariba caya.

E meta di e fundacion ta adresa e gran problema di demasiado cacho y pushi ariba caya na Aruba, e abuso y negligencia di cacho y e falta di conscientisacion y educacion ariba e topico aki.

Den un entrevista cu Mercedes de Bruyn, miembro di e directiva di AWAA den luna di juli, el a splica Bon Dia Aruba cu e idea di AWAA ta pa establece un clinica di sterilisacion local pa famianan di menos recurso y e enfoke principal ta sterilisacion hunto cu conscientisacion.

Pa loke ta trata e veterinarionan pa realisa e cirugianan, mirando cu ya caba veterinarionan no tin suficiente tecnico di cirugia, De Bruyn a remarca cu nan mes lo realisa e cirugianan aki. Nan lo traha cu hopi boluntario pa sikiera e prome mita di aña pasobra tur e fondonan necesario pa e clinica aki lo wordo recauda y manera de Bruyn a indica nan mester hopi fondo pa por establece un proyecto manera esaki.

“P’esey mes e clinica lo wordo opera pa mas tanto boluntario nobo hunto cu boluntarionan di e fundacionnan cu ta forma parti di e organisacion nobo aki. E no ta fundacion forma pa otro fundacionnan, e ta un fundacion cu a wordo forma pa personanan cu ta involucra den otro fundacionnan,” de Bruyn a indica.

E conexion cu esaki, AWAA ta buscando veterinario y tecnico di veterinario boluntario pa bin Aruba y traha den nan clinica pa yuda maneha e problematica di poblacion di cacho y pushi riba caya na Aruba.

Un publicacion ariba nan pagina di Facebook ta splica cu e fundacion ta ofrece estadia pa e boluntarionan cu bin Aruba, orario diario di cirugia di sterilisacion di 8or pa 4or y e boluntario por scoge entre e siguiente simannan pa bin Aruba: siman 1 januari, 2 pa 6; siman 2, januari 9 pa 13; siman 4, januari 23 pa 27; siman 6, februari 6 pa 10 y simannan 8 te cu 11.

Pa mas informacion por tuma contacto cu e fundacion a traves di nan pagina oficial di Facebook.