Ayera den oranan di mainta, Aruba Tourism Authority (ATA) conhuntamente cu Aruba Hospitality and Security Foundation a realisa un conferencia di prensa pa anuncia cu nan a firma un acuerdo pa enfoca riba reintroduccion di un plataforma cu lo carga e nomber Tourism Security Patrol (TSP), e cual tin e intencion pa brinda asistencia na KPA y vigila e siguridad den diferente zona turistico, entre otro.

Ronella Croes CEO di ATA a splica cu Aruba, segun proyeccionnan pa e aña, aki ta spera un total di 1.1 miyon turista cu lo bishita cu avion ademas di otro 750 mil bishitante di barco crucero, caminda den temporada halto di turismo si lo inclui e fluho di bishitantenan di barco, den un luna Aruba por ta sperando un total di 200 mil bishitante riba isla.

“Esaki ta un cantidad grandi cu ta bishita nos pais y aki ta bin e importancia di e fundeshi di nos turismo,” Croes a sigura.

Esey ta consisti di tres aspecto manera el a bisa. Un di nan ta e siguridad unda cu esey ta duna e trankilidad na e bishitantenan y poblacion, e otro aspecto ta e playanan, ademas di e hospitalidad y cordialidad, e puntonan aki ta e fundeshi di Aruba su turismo y e producto cu ta wordo exporta.

Na aña 2001, AHATA a institui e fundacion Aruba Hospitality and Security Foundation y desde e momento ey, diferente organisacion ta forma parti di e organisacion aki. Na aña 2011 ATA a tuma na su encargo e financiamento di e fundacion y tur e diferente actividadnan y conforme na esey. Anualmente ta reuni varios biaha cu e miembronan di e hunta y tambe pa e actividadnan di e fundacion.

Esunnan cu ta forma parti di esaki ta AHATA, ATSA, ATIA, KPA, ATA, entre otronan cu for di 2011, segun Croes a menciona di nan experiencia cu e fundacion aki, por bisa cu a enfoca riba diferente proyecto y actividadnan como training pa esunnan cu ta traha den e parti di siguridad den area turistico, training pa esunnan cu ta traha na KPA y tambe a yuda KPA den diferente otro manera, como por ehemplo, cumpramento di ekipo pa strandpolitie, establecimento di oficinanan den area di Oranjestad, unda ta brinda e servicio necesario na turistanan cu ta bin cu barco y un otro cu Croes a trece dilanti ta e cumpra di camaranan cu lo a coloca den zona di Palm Beach.

Conhuntamente cu e directiva di e fundacion aki a bin ta prepara pa amplia un otro parti cu nan ta considera importante, lo cual ta e visibilidad. Di esaki Croes a papia riba e Visibility Team cu ta existi for di añanan pasa, cu sigur a brinda su fruto pa e industria turistico na unda un di e metanan tabata pa reintroduci un tipo di Visibility Team y esaki a bin ta traha riba dje.

E acuerdo cu nan a firma ayera cu tin un duracion di tres aña ta enfoca riba reintroduccion di un plataforma asina aki cu lo carga e nomber Tourism Security Patrol (TSP), cual tin e intencion pa brinda asistencia na KPA, vigila e siguridad den diferente zona turistico enfocando den e playanan cu lo cuminsa acapara e zona for di Divi Tamarijn te cu Hotel Ritz Carlton y lo amplia esey pa asina den dado momento cubri e area for di Bushiri te cu Arashi.

“E acuerdo aki lo sigura cu lo tin tur espacio pa e fundacion por traha pa logra e metanan tambe y logra e implementacion debido tambe di e TSP,” Croes a bisa.

Banda di esaki, el a sigura cu tambe tin e Tourism Oriented Police. Nan ta esun cu ta encarga cu e zona di turismo crucero pa asina ey e fundacion por brinda mas siguridad y colaboracion na esunnan cu tin mester di esaki pa duna mas apoyo na polisnan di KPA.

Nan ta conta cu sosten di Ministerio di Husticia na unda a papia caba tambe riba e posibilidad pa duna na e forsa aki nobo e status di buitengewoon opsporingsambtenaren (BOA), lo cual ta algo cu lo por cristalisa pa di e forma ey e ekipo aki por tin un tiki mas di autoridad y por brinda asistencia di e manera aki tambe.

“Nos ta hopi gradici di e trabou haci door di e fundacion te cu aworaki, cu su miembronan actual y tambe cu esunnan cu a labora durante añanan,” Croes a expresa.

Presidente di e fundacion Aruba Hospitality and Security Foundation, Dylan Molina, a expresa cu e fundacion, manera a wordo menciona caba a ser funda na 2001 door di AHATA cu asistencia strategico di KPA cu e meta di mehora e siguridad di turismo, su mision ta pa desaroya y facilita iniciativanan di hospitalidad y siguridad door di aliansanan entre sector publico y tambe sector priva pa asina ey mantene un Aruba mas sigur.

E fundacion ta conta cu un directiva independiente cu ta representa pa diferente stakeholders unda su prome proyecto tabata e Visibility Team, unda actualmente esey a haci un transicion pa duna un apoyo na KPA door di haci ekiponan special disponibel unda for di 2019 caba e fundacion a dicidi di renoba nan rumbo y awor ta enfoca specificamente riba training di siguridad y un presencia mas grandi di visibilidad di siguridad den areanan cu turistanan ta bishita mas na Aruba.

E presupuesto aworaki ta sosteni door di ATA pa via di impuesto di acomodacion cu ta wordo cobra pa turistanan cu ta bishita e isla, na unda Molina a sigura cu “siguridad ta sigui hunga un rol importante pa turistanan cu ta scoge nos isla y e rol cu siguridad ta hunga den un decision tambe ta uno cu a bira importante y mas grandi cu mas enfoke riba dje.”

Tambe el a informa cu e aña aki nan a caba di cuminsa cu e proyecto di TSP y na luna di februari specialistanan di Chameleon Consultants, un organisacion renombra di siguridad, ta bin Aruba pa cuminsa un investigacion intensivo pa por fiha e necesidadnan specifico di un proyecto asina pa por haya un recomendacion y cuminsa cu e proceso pa e aña aki nan por implementa y implementa e TSP.