Durante e di dos dia di bishita real, su mahestad Rey Willem Alexander, su mahestad Reina Maxima y prinses heredero, Prinses Amalia a bishita Universidad di Aruba na unda nan a haya un presentacion di e facultad di Ley, nan a participa den un quiz chikito ariba diferente topico di Reino y nan tibetan e oportunidad di combersa cu e studiantenan di e diferente facultadnan di e universidad.
Bon Dia Aruba a combersa cu algun di e studiantenan cu a haya e oportunidad pa papia cu e famia real, como tambe cu Gobernador di Aruba y Secretario di Estado, Alexandra van Huffelen, y nan a conta un tiki di e topcionan cu nan a combersa y con e experiencia aki tabata pa nan.
Lianne Candelaria un studiante di e facultad di ley na universidad a combersa cu su mahestad Rey Willem-Alexander. El a conta cu e nan a papia di e concordantie beginsel (principio di concordancia) cu ta e principio na unda ta para den ley cu Hulanda y e otro islanan den Caribe mester purba mas hopi cu ta posibel haci cu e ley ta igual pa tur.
El a splica cu en berdad e leynan tin algun diferencia na e diferente islanan, por ehempel pa motibonan reliogoso of cualkier otro motibo di diferencia entre paisnan, pero segun un articulo den Statuut, e paisnan mester purba mas hopi cu ta posibel pa e leynan keda mescos.
Di su experiencia personal, Candelaria a expresa cu e ta hopi contento cu e experiencia. El indica cu ora cu el a papia cu e rey, e rey a mustra su apoyo tocante cu no solamente e luganan den Caribe mester adapta nan ley na esunnan di Hulanda, pero tambe cu nan por traha hunto cu e islanan pa por yega na leynan nobo cu tur e otro islanan den Caribe tambe por beneficia di dje.
“Mi ta hopi contento cu nos por a tende esey di e rey pasobra mi ta kere cu Aruba mes tin biaha nan ta sinti cu e famia real no ta apoya nos, pero e ta nice pa sa cu nan tambe tin hopi gana di traha hunto cu nos y cu nan ta para tras di nos,” el a agrega.
Keanu Maduro, studiante di Social Work & Development, a haya e oportunidad di combersa cu su mahestad Reina Maxima y e prinses heredero, Prinses Amalia. El a conta Bon Dia cu nan a keda sorprendi cu e reina y e prinses a bin cu algun pregunta tocante trabou boluntario y e veld social di Aruba unda nan tambe por a comparti di nan banda y splica con nan experiencia ta como studiante na Universidad di Aruba.
“Pa mi e tabata algo completamente nobo pasobra mi nunca a haya un oportunidad asina, e tabata hopi leuk pa tin e aporte tambe di con un reina y un prinses ta pensa tocante e veld social di Aruba cu toch wel ta un bon feedback cu nos a haya y un bon interes tambe,” Maduro a expresa.
El a remarca cu nan a splica un tiki di por ehempel e parti di trabou boluntario y con e ta un tiki dificil tin biaha pa keda mantene e boluntarionan y keda mantene nan activo. El a agrega cu nan papia tambe tocante aspectonan social den e veld pa duna un descripcion general chikito di con e ta mustra aki na Aruba compara cu Hulanda.
“Nan tabata echt disfrutando di e combersacion y nan a gusta e informacion cu nos a duna nan. Mi a hasta tuma nota di cierto cosnan, dus e tabata bunita pa experiencia,” el a indica.
Otro studiante cu a combersa cu su mahestad Rey Willem Alexander tabata Lux Grauzinis, studiante di e programa SISSTEM. El a conta cu e hunto cu su amigonan studiante den e mesun programa a papia cu e Rey y e gobernador di Aruba y nan a papia tocante kico e programa SISSTEM ta, kico nan ta haciendo y kico SISSTEM por nifica pa e futuro di Aruba, pa un Aruba mas sostenibel y saludabel, specialmente ora ta trata di flora y fauna y con tur e studiantenan ta envolvi den proyectonan y ricibiendo e data cu Aruba no tin ainda pa haya e informacion necesario pa un miho futuro.
“Pa mi e tabata un honor pa wordo invita pa papia cu nan y por representa nos scol y e programa SISSTEM den un manera asina bunita y haya nan atencion pa algo cu normalmente no ta ricibi e atencion cu e merece,” Grauzinis a bisa tocante su experiencia unico aki.
Por ultimo el a agrega cu e su mahestad e Rey y e Gobernador di Aruba tabata hopi receptivo y cu hasta e Rey a comenta cu un di su yiunan ta debatiendo bin Universidad di Aruba pasobra e ta interesa den ciencia marino, “e lo ta un punto di interes y e tabata hopi entusiasma di tende di e aspecto ey di nos programa tambe.”
