Minister di Husticia y Asuntonan Social, Rocco Tjon ayera mainta a duna un conferencia di prensa pa anuncia e firmamento di un Letter of Intent (LOI), pa asina Cuerpo Policial di Aruba por haya un localidad nobo na districto di Playa.

Minister Tjon a splica cu nan a tene cuenta cu diferente aspecto pa e warda aki por cumpli cu tur e rekisito y deseonan di Cuerpo Policial, pero na mesun momento tambe nan a tuma den consideracion otro aspectonan, como por ehemplo seguridad.

El a conta cu door di bon comunicacion entre e partidonan, dia 1 di februari nan a tene un reunion cu alto mando tocante e topico aki, y consecuentemente su ministerio e reuni cu Sindicato di Polis (SPA) dia 3 di februari. Dianan despues, 9 di februari nan a haya e programa cu tabatin den dje tur e rekisito cu e localidad nobo mester cumpli cune y riba e mesun dia ey segun el a informa, nan a haya e prome oferta di e compania en cuestion.

Consecuentemente for di su ministerio e negociacionnan a cuminsa y dia 14 di februari e proyecto a keda aproba den Conseho di Minister. Ayera. dos siman despues cu henter e situacion a inicia, nan a firma e declaracion di intencion pa asina e trabaonan por cuminsa pa di e forma ey Cuerpo Policial por tin nan localidad nobo na comienso di april.

“Mi ta sumamente satisfecho y agradecido na tur e cuater partner cu a haci esaki posibel, Korpschef, SPA, AA ICG PB Real Estate VBA y sigur tur e trahado di nos ministerio,” Tjon a bisa.

Pa loke ta trata e localidad nobo, a bira conoci cu Warda di Polis di Playa lo muda for di Wilhelminastraat pa Paardenbaaistraat 12, cual ta e localidad caminda Consulado di Venezuela tabata ubica anteriormente, na unda nan a tene cuenta cu diferente aspecto y deseonan cu Cuerpo Policial y sindicato a indica.

Den e edificio aki a tene cuenta cu tur mobiliario nobo, ya cu a renoba e edificio a caba pero nan lo sigui cu e trabaonan di adaptacion. A tene cuenta cu e parti di seguridad, na unda minister Tjon a indica cu lo tin sistema di Intercom cu camaranan pa garantisa e seguridad y e parti di “verlichting”.

E proyecto aki lo conoce un expansion na e edificio actual, mirando cu lo mester bin “ophoudkamers” den e edificio pa por cumpli cu e rekisitonan di un warda di polis. Na mes momento lo tin control di acceso, un sistema automatisa y moderno pa asina por eleva seguridad.

Algo hopi importante tambe ta e parti di mantencion, particularmente pa e parti di schimmel, cual tabata un topico hopi sensitivo, pa cual motibo a percura pa den e LOI e compania en cuestion percura pa tin mantencion structuralmente pa e parti di “luchtbehandeling” y airconditioning.

Di su parti, alto comisario di Cuerpo Policial di Aruba, Ramon Arnhem a expresa cu su persona ta hopi contento pa motibo cu e bienestar y seguridad di su coleganan polis ta hopi importante y cu den un tiki tempo nan a logra un bon resultado.

E problema di schimmel na warda di polis tabata un topico cu recientemente a bin gara forsa mirando e consecuencianan cu esaki tin pa e mesun salud di e trahadonan di Cuerpo Policial. E propio presidente di sindicato di Polis, Rodney Solognier conhuntamente cu leiding a trece dilanti cu nan tabata buscando un luga nobo pa muda lo mas pronto posibel.

Recientemente, alto comisario Arnhem tambe a trece dilanti su preocupacion pa loke ta trata scarsedad di polisnan, na unda esaki, segun a confirma den conferencia di prensa ayera, tambe ta un otro punto di atencion y ta keda pendiente.

Di esaki minister Tjon a sigura tin fondonan disponibel suficiente pa aloca pa e parti di material, na unda cu den presupuestonan anterior pa loke ta realisa, e aña aki tin un aumento di mas cu 3 miyon florin pa por adkiri tur material cu Cuerpo Policial tin mester.

“Tin masha hopi proyecto tambe caba cu a aproba y ta den ehecucion, como por ehemplo e proyecto di ICT caminda ta un proyecto di mas di 1 miyon florin cu a wordo aproba y ta den ehecucion. Dus tur computer di KPA ta bay wordo cambia y esaki tabata un preocupacion hopi grandi cu a wordo treci dilanti door di alto mando y tambe di sindicato di polis. Uniformnan tambe ta bay wordo cambia igualmente e vestnan cu ta bay deliver dentro di poco na unda cu den combersacion cu korpschef nos tabata papia di mantencion of si na dado momento mester adkiri nobo y p’esey nos a aproba un programa cu ta sistema nobo, cu ta bay monitoria tur e contractonan y maneha tur e parti di mantencion di bedreigd voering ta bay wordo digitalisa,” el a finalisa.