E siman aki durante un conferencia di prensa, Minister di Enseñansa y Deporte, Endy Croes, a elabora ariba diferente proyecto cu ta andando y cu ta bay cuminsa tanto den e area di enseñansa como esun di deporte.

Prome proyecto cu minister Croes a elabora riba dje ta esun di e renobacion di St. Aloysius School. El a splica cu na april aña pasa a duna inicio na esaki despues cu haya e scol den un estado bastante deteriora na momento cu el a asumi e responsababilidad como Minister di Enseñansa y Deporte.

El a recorda cu e minister anterior kier a haci esaki otro tipo di scol, pero despues di analisa e situacion nan a sinta cu tur e stakeholders y DOW a traha un rapport, na unda ta indica cu por renoba e scol y no necesariamente mester basha esaki abao.

E renobacion di e scol a cuminsa na mei di 2022 y siman pasa e minister a bishita e sitio pa asina observa e avancenan di e proyecto aki. Segun el a indica, a renoba 12 local completamente, e kantoor pa cabesante y e espacio di reunion tambe, a realoca e bañonan y a traha bañonan completamente nobo, a traha un pos completamente nobo y tambe a traha un sala di biblioteca completamente renoba.

Minister Croes a enfatisa cu ya caba a basha un piso na unda lo bin un gymzaal, ya cu e scol aki no tabatin gymzaal anteriormente. El a agrega cu falta ainda e parti pa loke ta e speelplaats cu tambe ta bay renoba y e airconan mester ta instala.

“E renobacion aki ta canando, manera nan ta bisa ‘biento en popa’, y nos ta hopi contento di por a observa esaki. Dentro di dos luna nos lo t’ey back y sigur St. Aloysius School lo habri pa e aña escolar nobo den nan edificio moderno y renoba, kizas hasta prome. E parti ey mester determina ainda dependiendo con lihe e renobacionnan aki lo sigui avansa,” el a remarca.

Otro proyecto cu e minister di Deporte e enfatisa tambe y cu lo cuminsa pronto ta e renobacion di Stadion Guillermo Prospero Trinidad. El a splica cu e renobacion aki lo cuminsa oficialmente dia 27 di februari proximo. Despues den luna di maart lo tuma luga un acto simbolico di e ponemento di e prome piedra pa e inicio di e proyecto.

Pa loke ta e trabaonan di renobacion, ta bay basha e tribuna cu tin actualmente abao, pa motibo cu esaki ta afgekeurd pa weganan internacional por tuma luga y lo construi tribuna completamente nobo. Lo duna atencion tambe na e yerba, ta bay cambia e yerba artificial tambe completamente, ta bay remodela e luznan, tambe ta bay remodela e atletiek band den e fase aki y VIP room tambe lo haya atencion.

E renobacion di e stadion aki ta wordo financia pa Gobierno di Aruba y e reinauguracion di e stadion ta premira pa aproximadamente luna di october di e aña aki mes.

Segun Croes a indica, presidente di Comite Olimpico Internacional, Sr. Thomas Bach como tambe presidente di Panam Sports, Neven Ilik, lo ta na Aruba y nan ta tratando di combina e schedulenan cu e ponemento di e prome piedra simbolico na Stadion Guillermo Prospero Trinidad.

Otro proyecto cu ta andando cu Minister Croes a menciona ta e renobacion di e basketball court den Village. El a indica cu ultimo biaha cu a renoba esaki tabata na aña 2009, durante gabinete di Nel Oduber. Durante e prome siman di februari a cuminsa cu e renobacion aki.

Otro proyecto cu ta regarda deporte cu el a anuncia, ta tocante un curso den e area di deporte na Universidad di Aruba. El a splica cu despues di diferente comunicacion entre Ministerio di Deporte, Universidad di Aruba y tambe Universidad di South Carolina a logra cuminsa cu un curso di sport management.

“Nos ta contento cu varios persona a inscribi pa e curso aki. E ta cuater siman, un luna completo y nos ta contento pa mantene e vision bibo cu asina nos por progresa mas pa loke ta e parti di maneho di deporte cu ta algo lo por contribui pa Aruba,” el a destaca.

El a agrega cu despues di e curso aki e participantenan lo ricibi un certificado y esnan cu sinti e necesidad pa bay mas leu, Ministerio a percura tambe den coordinacion cu Universidad di Aruba y Universidad di South Carolina, den luna di juli/augustus, pa cuminsa cu un master opleiding di un aña pa e curso aki.

Investigacion di deporte

Banda di esey, el a informa, Universidad di Aruba ta preparando tambe cuater investigacion ariba e tema di deporte. E investigacionnan aki ta den e fase di diseño aworaki y e investigacionnan aki lo bay ta den diferente parti.

Algun di esakinan ta inclui ‘ki balor deporte tin pa localnan den comunidad di Aruba’, un inventario y evaluacion di tur facilidadnan deportivo na Aruba. Tambe lo evalua posibilidadnan pa torneo di hobennan por tuma luga na Aruba, esaki den conexion pa wak con por engrandece e turismo di deporte cu hopi ta papia di dje.

Ta premira cu e aña aki mes e resultadonan lo ta cla y esaki lo duna direccion tambe na e Ministerio di Deporte cu lo usa e data di e investigacionnan aki pa tuma decisionnan.

Minister Croes a elabora tambe ariba e Plataforma 1, un plataforma cu a wordo forma bao maneho di Minister Croes. E plataforma aki ta encera tur e directivanan di scolnan na Aruba y na momento cu tin temanan di interes importante, ta yama e reunionnan aki, cu ta tuma luga alrededor di cada seis siman.

Siman pasa a tuma luga e prome reunion di Plataforma 1 y Croes a splica cu su persona hunto cu directora di Directie Onderwijs y e 10 directivanan di scol a sinta pa atende temanan specifico y asina discuti, debati y tuma decisionnan cu tin di haber cu e maneho di tur e scolnan.

Minister Croes a duna informacion tambe cu e doorlichting rapport a keda cla. Segun Minister a priminti na e directivanan di scol, e siman aki e rapport ta wordo publica y asina oficialmente tur hende lo tin acceso desde e siman aki na dicho rapport

El a agrega cu a duna splicacion tambe con esaki ta funciona y a splica tambe cu den e vierlanden overleg den luna di januari na Corsow, Inspectie di Hulanda tabata presente y a duna presentacion ariba tur tres doorlichting rapport di e tres islanan. El a menciona cu tin conexion ariba algun punto cu via Ministerio nan kier trese esaki dilanti.

Por ultimo el a indica cu nan a duna splicacion di e plan di acercamento, a duna splicacion di e agenda di implementacion y con esaki ta bay funciona moviendo pa dilanti.