Camara di Comercio (KvK) ta ripara cu cerca e comerciantenan actualmente ta existi cierto pesimismo riba e futuro di nan negoshi. Un porcentahe halto di e comerciantenan ta percibi cu nan tin chens di cera nan negoshi durante 2021.
“Esey ta bisa bo cu e cos ta duro,” presidente di KvK, Omar Tromp a bisa. Ultimo tempo un total di 522 negoshi a yega di cera. Sinembargo 1264 negoshi nobo a habri durante aña 2020, segun data di KvK.
Un fenomeno straño tabata cu – a pesar di e pandemia – na 2020 e registracion di negoshi nobo tabata un tiki mas cu un aña prome. Presidente di KvK ta kere cu e fenomeno aki ta debi cu hopi hende a habri un negoshi nobo, y wanta esun cu ya e tabatin existente caba. Den caso cu nan mester cera, nan ta sigui cu e negoshi nobo.
Alivio fiscal y comercio
E pakete di beneficionan fiscal cu gobierno a yega di introduci a yuda e comerciantenan. E alivio fiscal 2 ta un iniciativa pa activa nos economia
Te hasta, a pesar di e recesion economico debi na e pandemia y e risico cu esaki ta trece cune pa cualkier inversion, tin mas negoshi ta bin registra na KvK. Segun Tromp e registracion ta sigui drenta den Camara di Comercio keto bay.
A pesar cu presidente di KvK, Omar Tromp no a trece cifra, pero si el a afirma cu loke nan ta mira ta mas tanto registracion specialmente di negoshi chikito cu lo kier beneficia di e alivio fiscal. E sectornan cu mas a registra un aumento ta esunnan tradicional: construccion, horeca (cuminda y bebida) y consultoria.
El a splica cu vooral si ta un tipo di negoshi chikito cu ta gana menos cu 84 mil florin pa aña of 7 mil florin pa luna no mester paga BBO, BAZV y BAVP, nan tin un alivio fiscal. E ta bira un incentivo “basta bon.” Hopi compania ta habri nan eenmanszaak pa keda bao di e cifra aki. “Si! Mi ta kere cu esey ta stimula comercio,” Tromp a declara.
Mas tanto el a referi na e punto aki y no riba e otro puntonan cu e ley di e di dos pakete di alivio fiscal ta inclui den dje. Pa KvK ainda ta basta tempran pa bin cu un analisis riba e tereno fiscal aki.
Te aworaki e reaccion di e comerciantenan cu a drenta na KvK ta mixto. Pero e comentarionan positivo cu si a drenta tin di haci cu e reduccion di BBO cu e negoshi chikito tin cu paga. Pues e presidente di KvK ta haya cu e tipo di negoshi chikito ey ta esunnan cu ta beneficia ora cu nan no tin cu paga BBO.
Na luna di december ultimo KvK a haci un analisis si e alivio fiscal introduci pa ministerio di Finanzas y Asunto Economico, berdaderamente ta bira un alivio pa sector comercial den e temporada aki di Covid crisis. Te ainda nan no tin mucho claridad riba esey, pero si como KvK nan a asumi e tarea di splica y guia e comerciantenan riba e beneficionan di e alivio fiscal.
