Segun presidente di FTA, Hubert Dirkzs: Trahadonan di De Palm Tours tin duda si compania ta cumpli cu ley di labor

Como un gran logro sindical pa salvaguardia derecho di e trahadonan, asina FTA a cualifica e resultado di e referendum pa representa e trahadonan di De Palm Car Rental VBA.

Nan ta un grupo total di 58 trahado cu ta inclui e chauffeurnan, bus driver y tambe e operation supervisor. Mayoria di nan a haci uso di nan derecho di voto den e referendum aki celebra diabierna atardi na sede di Mediador di Gobierno.

Logro sindical

“Nos ta hopi contento. Nos ta aplaudi expresion di e trahadonan. E lucha y boluntad pa bira miembro di e sindicato,” presidente di FTA Hubert Dirkzs a declara.

E sindicalista a laga sa cu esaki ta un gran logro sindical, ya cu pa hopi aña nan a purba drenta den De Palm Tours pero nan no a logra. FTA a celebra un referendum hopi tempo pasa caminda nan a purba di haya e trahadonan. “Pero lamentablemente e trahadonan a hala atras y na ultimo ora e referendum a bay malo, y nan no a logra e mayoria,” el a bisa.

Pero e biaha aki, FTA por a mira cu e trahadonan tabata dicidido pa nan bira miembro di e sindicato aki y asina FTA por a representa nan oficialmente. Na ocasion aki cu FTA a gana e referendum, sindicalista Dirkzs a bisa cu nan ta bay mesora pa atende cu tur asunto cu tin e trahadonan preocupa riba dje. Nan ta problemanan laboral y cumplimento di nan derechonan. Despues di atende cu e problemanan aki na final como prome paso, nan lo por firma un protocol cu e compania.

FTA a yega di reuni un biaha so cu e trahadonan caminda a sali dilanti cu hopi punto cu ta relaciona cu custumbernan of tambe loke ta stipula den ley, no tin claridad cerca e trahadonan.

“Tin hopi duda cerca e trahadonan si e compania ta cumpli cu e leynan di labor manera mester ta,” el a bisa. Esaki ta un aspecto cu FTA awor como representante legal di e trahadonan aki di De Palm Tours, ta bay wak di cerca.

E sindicalista a agrega cu e derecho di e trahadonan -segun nos leynan- mester wordo respeta. P’esey nan kier sinta na mesa lihe cu gerencia di De Palm Tours pa asina trata e preocupacion laboral aki. Logicamente teniendo na cuenta unda e trahadonan mester cumpli y unda e compania mester cumpli tambe, segun Dirksz.

Contract colectivo

E lider FTA a bisa cu nan ta consciente como sindicato cu nos pais ta pasando den momentonan hopi dificil. P’esey despues di e firma di un eventual protocol, nan lo prepara y hinca un contract colectivo (CAO) den otro. Kiermen un proposicion cu e sindicato lo entrega na e compania pa esey por bira e CAO cu nan por negosha pa e trahadonan.

Apenas a transcuri un luna y mey di 2021, y ya caba sindicato FTA a yega di pidi varios referendum. Dirkzs a informa cu nan a pidi dos referendum mas cu ta na caminda. E tin di haci cu trahadonan na servicio di companianan chikito cu ta acercando e sindicato, mirando e situacion actual di instabilidad laboral debi na e pandemia.

Den e caso di De Palm Tours, el a referi cu ta trata di un compania grandi, caminda e biaha aki nan a logra representa un seccion of departamento di e compania menciona. Sinembargo FTA ta kere cu si e parti aki ta haya sa cu no tin problema pa nan ta miembro di e sindicato, y cu FTA por atende nan problemanan cu tur trankilidad y cu respet mutuo, tur e otro trahadonan di e compania aki, nan porta ta habri pa bira miembro di e sindicato aki, segun Hubert Dirkzs.