Durante su conferencia di prensa ayera mainta minister Gerlien Croes a duna un splicacion tocante kico ta e situacion actual pa loke ta trata e minister plenipotenciario saliente na Hulanda Sr. Ady Thijsen.
El a splica cu na momento cu Gabinete AVP-FUTURO a haci su entrada como gabinete, Sr. Thijsen a ricibi su “eer van ontslag” como minister plenipotenciario na Hulanda. Den e caso di Sr. Thijsen, como cu e gabinete saliente a nombra Sr. Thijsen como representante na Union Europeo.
E mandatario a sigui splica cu Aruba ta un isla cu un laso special cu Union Europeo y ta un di e islanan LGO (Land en Gebied Overzee) den Union Europeo. E organisacion OCTA ta representa tur e islanan aki na Bruselas y na cierto momento Aruba a haya e presidencia di e comision y Sr. Thijsen a bira e presidente cu a carga e responsabilidad aki desde 2022.
Minister Croes a splica cu Sr. Thijsen a haya su mes cu un reto financiero cu a sucede bou di e presidencia prome cune y tambe bou di su presidencia tabatin algun malcomprendemento y retonan cu e comision Europeo cu ta duna OCTA placa pa haci e trabounan pa e islanan.
Considerando e situacion aki a bin un proceso largo unda cu nan a sinta negocia cu e comision Europeo, a bin abogadonan den e ronda y na momento cu Sr. Thijsen a ricibi su “eer van ontslag” como minister, a comparti cu gobierno nobo cu tin un situacion na Union Europeo cu abogado canando y como presidente di e comision tabata desea di termina e proceso of laga un dossier atras pa esun cu lo tuma over pa por continua cu lo necesario.
Gabinete AVP-FUTURO a duna e OK na Sr. Thijsen y a dun’e dos luna di tempo pa haci e trabou aki teniendo na cuenta cu tanto e minister plenipotenciario como representante na Union Europeo ta un funcion politico.
E dos luna aki ta termina aki tres siman y asina Sr. Thijsen lo retira oficialmente tambe como representante na Union Europeo. Mester remarca cu den e acuerdo di dos luna di tempo cu Thijsen a ricibi tambe ta inclui e 30 dia di tempo cu un minister plenipotenciario ta haya pa organisa su pertenencianan y regresa Aruba.
