Tin hopi preocupacion entre hotelnan na Aruba cu e cantidad di contagio di Covid19. Tin interes grandi pa bishita Aruba, pero e cancelacionnan tambe ta grandi. Ora cu Aruba a habri su fronteranan a habri na juli, hotelnan a haya mas reaccion cu nan a spera. Y tabatin speranza cu Aruba lo por logra recupera mas cu por a spera den un tempo di pandemia. E reaccionnan cu e propio turistanan tabata pone riba medidanan social tabata yuda y stimula mas hende pa bin Aruba.

Pero, tur cos a cambia cu e cluster di contagio di Gusto ( y otro barna). Hotelnan por a wanta e reservacionnan pa un par di siman, pero esnan cu tabata cla pa bin Aruba a cuminza mira cu e cifranan di contagio memey di localnan no tabata baha, al contrario. Tur dia por a mira e preguntanan y locual por a spera, e cancelacionnan a cuminza drenta na cantidad.

Bon Dia Aruba a compronde di varios hotel cu a y ta considerando pa cera nan portanan indefinidamente, te ora cu e perspectiva economico mehora. E motibo ta simpel. E gasto pa wanta un hotel habri ta mas cu djis e salarionan, e ta gasto di coriente cu ta core den algun cien mil pa luna y awa, pa menciona algun. Hotelnan berdad a aplica pa e subsidio di salario, pero nan tin nan costo pa nan trahadonan. Y cu un ocupacion hopi abou, e perdidanan ta acumula.

AHATA no a bay den detaye riba e casonan aki, pero unicamente a bisa cu ta hopi preocupa cu e incertidumbre y perdida den e ultimo siete lunanan aki.

Ritz

Louella Brezovar van Veen di Ritz Carlton Aruba a bisa Bon Dia Aruba, cu e recuperacion ta keda den man di comunidad di Aruba. Pasobra e interes pa Ritz tabata hopi grandi. Ya a haya gruponan, y hasta bruidnan cu ta trece gruponan grandi. Pero lamentablemente a mira cancelacionnan debi na e informacion di contagio memey di e comunidad mes.

“Pero Ritz ta keda optimista. Nos ta spera cu e contagio por baha, pasobra tin hopi interes pa hendenan bin Aruba pa Thanksgiving cu ta November, pero tambe pa Pasco. Ademas, esnan cu a bin Aruba y keda cu nos tabatin hopi bon experiencia. Tabatin cu na momento di a check out, prome cu a tuma su transporte pa hotel, a haci su reservacionnan pa November. P’esey nos ta optimista”

Brezovar van Veen a bisa cu Ritz en todo caso lo keda opera, pasobra tin tur confianza den e producto y mas cu tur cos, e compania tin un compromiso cu Aruba. E doñonan ademas di e hotel na Aruba ta desaroyando mas resort den Caribe, pero nan ta mas cu dispuesto pa absorba perdidanan awor cu speranza cu e situacion lo mehora.

“Nos damanan y cabayeronan (empleadonan di Ritz) ta bon prepara, ta atene na tur regla di higiena. For di juni nan ta trahando cu masks, ta atene na regla di higiena y distanciamento social. Nan no ta trahando tempo completo (fulltime) ya cu ta ricibiendo e loonsubsidie. Ritz tin mas di 500 empleado y nos tin un compromiso cu nan.”

Di otro banda, cu e situacion ta dificil ta logico. “Bon ta algo otro. Nos tin cu tene cuenta cu leynan laboral y otro. Nos ta cortando fuertemente unda cu por.”

E lamentabel ta cu e hotel tabata riba bon caminda. E cifranan di Augustus te cu October tabata bon y a duna hopi confianza. “Te ora cu e casonan local a explota.” Brezovar van Veen a finalisa bisando cu hotelnan a gasta hopi placa pa sigura cu turista y empleadonan ta sigur y cu nan por keda sin haya e virus. Turistanan ta compronde e situacion y ta colabora. Awor ta spera cu ta comunidad tuma Covid19 realmente na serio, pasobra e ta afecta no solamente e salud di hende, pero tambe economia di henter un pais.

Potret: arubasunsets.com

LEAVE A REPLY

Please enter your comment!
Please enter your name here