Como reaccion riba un carta di diputado Nina den Heyer, minister ArieSlob (medionan di comunicacion) a dicidi pa por lo pronto prolonga e sosten pa medionan informativo di Boneiro cu 6 luna. Pa e sector di medionan di comunicacion (profesional) na nos isla e ministerio a reserva un suma di $ 106.000,–, asina e mandatario a confirma den un carta pa e diputado.

‘Awor aki tambe ta i ta keda importante cu medionan di comunicacion – corant, radio, television y plataformanan ‘online’ – por keda eherce nan trabou adecuadamente. Ta un conexion indispensabel den un comunidad democratico. Pa e motibo aki tambe mi a dicidi cu un prolongacion di e sosten pa e sector di medionan di comunicacion na Boneiro ta necesario’, segun minister Slob.

Diputado Den Heyer ta contento cu e reaccion aki. El a pidi e mandatario pa sosten pa organisacionnan cultural na Hulanda Caribense tambe, cu como consecuencia di e crisis di corona ta confrontando problema financiero. E medidanan di sosten cu anteriormente gabinete a anuncia pa sector cultural ta sincronisa cu e situacion na Hulanda Europeo y p’esei nan no ta ehecutabel na e islanan BES.

Den Heyer: ‘Den mi carta mi a enfatisa cu cultura, banda di naturalesa y economia, ta un pila importante pa nos comunidad Boneriano. Minister Slob a contesta cu su colega Ingrid van Engelshoven ta trahando riba un prolongacion di e pakete di sosten actual y cu na momento di elaboracion di esei ta tene cuenta cu situacion di e sector cultural na Boneiro. Mi tin tur confiansa den esey y – hunto cu nos organisacionnan cultural mi ta anhelando e resultado.’

 

LEAVE A REPLY

Please enter your comment!
Please enter your name here