(AP) – E compania cu a ricibi e tarea di recupera e bienes di e compania di criptomoneda FTX a bisa cu nan a logra recupera y sigura e balor di 740 miyon dollar te cu awo, cual ta un fraccion di e potencialmente biyones di dollar cu ta falta di e compania su saco.

E cantidad a keda revela den documentonan di corte entrega pa FTX, cual a contrata e compania custodial di criptomoneda BitGo oranan despues cu nan a declara nan mes bancarota dia 11 di november.

E preocupacion mas grandi pa varios cliente di FTX ta cu nunca nan lo bolbe wak nan placa. FTX a fracasa pa motibo cu e fundador y e ex CEO Sam Bankman-Fried a usa e bienes di clientenan pa haci apuestanan den FTX su agencia Alameda Research. Bankman-Fried aparentemente tabata buscando pa haya mas di 8 biyon dollar di inversionistanan nobo pa asina repara e compania su balans. El a comproba cu no tin “nada manera conflicto di interes ‘safe’,” CEO di BitGo Mike Belshe a bisa den un e-mail.

E figura di 740 miyon dollar ta di dia 16 di november y BitGo ta calcula cu e cantidad recupera y bienes sigura probablemente a aumenta te na mas di 1 biyon dollar desde e di aki.

E bienes recupera pa BitGo awo ta blokia na South Dakota den loke ta yama un ‘cold storage’, cual ta nifica cu nan ta criptomoneda warda riba harddrive cu no ta conecta na internet. BitGo ta provee loke ta yama un “custodiano califica” bao di ley di South Dakota. E ta practicamente e ekivalente cibernetico di un compania cu tin e custodia di e finanzas, ofreciendo cuentanan segrega y otro servicionan di siguridad pa warda bienes digital.

Varios compania di criptomoneda a fracasa e aña aki mirando cu Bitcoin y otro criptomonedanan a colapsa den balor.

LEAVE A REPLY

Please enter your comment!
Please enter your name here