Fundacion Telefon pa Hubentud a anuncia ayera mainta durante un conferencia di prensa a anuncia e inicio di nan training basico pa futuro mentornan di e fundacion y alaves a anuncia tambe sosten cu e fundacion lo ricibi di parti di Aruba Airport Authority NV (AAA) pa aña 2022.

Kimberly de Cuba, trahado social di Telefon Hubentud, a splica cu e fundacion ta bay cuminsa aworaki cu su training basico pa mentornan, cu ta e personanan cu ta duna ayudo na e mucha- y hobennan, di forma boluntario, via telefon, e-mail y chat tur dia for di 2or te cu 6or di atardi.

Prome cu un persona por bira mentor y duna ayudo na e mucha- y hobennan, e persona mester ricibi un training basico. Tur aña Fundacion Telefon pa Hubentud durante e luna di april ta busca boluntario pa bira mentor cerca nan. Despues cu un persona solicita y pasa door di un entrevista, e persona lo sigui e training basico di Fundacion Telefon pa Hubentud cu ta tuma luga den luna di mei.

De Cuba a sigui splica cu durante e training basico e futuro mentornan ta ricibi 25 module. Algun di e modulenan ta encera por ehempel modelo di combersacion, tecnica di combersacion, formacion di gang, depresion, row, sexualidad, amistad, droga, alcohol y mucho mas. Na final di e training basico nan mester cumpli cu un stage di 6 ora y despues di e trayecto aki e persona ta bira un mentor y ta cla a duna ayudo na e mucha- y hobennan di Aruba.

“E aña aki no lo ta diferente, Fundacion Telefon pa Hubentud ta buscando personanan pa start cu e training basico di mentor. E mentor ta duna informacion, opcion y sosten emocional na mucha- y hobennan di Aruba via telefon, e-mail of chat. Nan ta pa preveni, reduci of stop cualkier problema of aclaria cualkier pregunta cu e mucha- y hobennan por tin pa cu nan mes of pa cu nan ambiente”, de Cuba a indica.

Rekisitonan cu mester cumpli cune pa por eherce e trabao di mentor ta inclui cu e mentor mester duna ayudo, informacion y conseho via telefon of internet minimo dos ora pa siman. Tambe e mester tin un bon dominio di idiomanan Papiamento, Ingles, Hulandes y Spaño. E persona mester ta entusiasma y disponibel, y tur persona cuminsando di 16 aña di edad por solicita pa bira mentor.

De Cuba a remarca tambe cu Fundacion Telefon pa Hubentud ta ofrece tur aña minimo dos training grandi, un ambiente placentero y di aprendisahe. Pa mas informacion tocante e training basico di Fundacion Telefon pa Hubentud por tuma contact cu e fundacion via social media of via telefon.

Director di Fundacion Telefon pa Hubentud, James Sneek, a enfatisa e importancia di e trabao cu e fundacion ta desplega pa mas di 20 aña na Aruba, y desde 16 di maart ultimo Fundacion Telefon pa Hubentud a cuminsa duna tambe sosten emocional, informacion y ayudo na mucha- y hobennan di e isla di Sint Eustasius.

El a indica tambe cu Fundacion Telefon pa Hubentud ta haci esaki basa ariba un beleid cu tin y e beleid aki ta trata loke ta caracter di un mucha y den tur su seguridad inverti den e mucha, pa asina mañan tin ciudadanonan vital cu por contribui na nan pais.

Sneek a anuncia e sosten cu AAA lo ta dunando Fundacion Telefon pa Hubentud pa loke ta aña 2022. “AAA tambe ta kere cu pais Aruba mester tin ciudadanonan vital, mester tin personanan cu mañan ora nan bira adultonan grandi nan por t’ey pa nan pais, nan por yuda nan pais y nan por hiba e pais tambe dilanti. Tur esaki ta tuma luga for di chikito, un inversion cu tin cu tuma luga den loke ta e persona, crea e persona, yuda e persona y asina e por duna back na su comunidad”, el a agrega.

Señora Barbara Brown di AAA NV a splica cu aña pasa nan tabatin e placer di por a contribui na un di e proyectonan los di Telefon pa Hubentud, separa di nan trabaonan normal di atende cu e mucha- y hobennan, caminda nan a apoya e proyecto “My Life My Change”. A traves di e proyecto aki nan a cuminsa ricibi mas informacion di loke telefon pa hubentud ta haci pa comunidad di Aruba, specialmente pa e mucha- y hobennan.

“E ayudo cu nan ta brinda na e grupo importante aki den nos comunidad ta sumamente valioso y manera James a bisa caba nos tambe ta kere cu nos mester inverti den e desaroyo di e mucha- y hobennan aki pa nan tambe ta un parti vital di nos comunidad na Aruba”, el a expresa.

Di e manera aki, Brown a remarca, nan a dicidi di contribui di un manera hopi mas structural na e trabao cu Fundacion Telefon pa Hubentud ta desplega y nan a tuma e paso pa bira un di e sponsornan di e fundacion. Di e manera aki, el a indica, AAA kier contribui na e bienestar y salud di e mucha- y hobennan di Aruba. “E ayudo cu Telefon pa Hubentud ta brinda na un manera anonimo y sigur ta sumamente importante pa henter comunidad”, el a agrega.

Brown a sigui enfatisa cu e trabao cu tur e boluntarionan cu ta traha pa Telefon pa Hubentud ta haci ta wordo altamente aprecia y ta algo cu sigur merece e sosten di AAA NV. “Ta un honor pa nos por colabora cu Fundacion Telefon pa Hubentud e aña aki y nos lo sigui explora e manera cu nos lo por sigui cu esey den futuro”.

Pa loke ta trata e tipo di sosten cu AAA lo ta brindando na Fundacion Telefon pa Hubentud, Brown a subraya cu nan lo duna aporte financiero pa e aña aki, den un suma cu nan a acorda cu e fundacion y el a señala tambe cu nan ta dispuesto pa sigui wak kico nan por aporta den futuro pa apoya nan gastonan operacional pa nan por sigui desplega e trabaonan cu nan ta haci bao di e comunidad di Aruba.