Minister de Meza, Minister Arends, director di Setar Roland Croes y abogadonan di Setar na Aruba y na Merca, Patrick Brown y Benton Curtis, a tene un conferencia di prensa den cual nan a informa –  te con leu ta permisibel huridicamente – riba e situacion na Setar di un supuesto fraude di miyones cometi pa un empleado hunto cu su complicenan y e investigacion andando al respeto. E fraude a tuma lugar na Merca y ta pesey cu tin un abogado Mericano envolvi, tambe pasobra e caso penal ta bay ta na Florida. A yama e rueda di prensa pasobra e siman aki a habri cu hopi pregunta y frustracion di loke ta pasando.

Na momento cu sr. Egbert Koolman su nomber a sali riba e lista di Panama Papers, segun minister de Meza, diferente speculacionnan a tuma luga despues. No a bay cu e informacion aki na Parlamento pasobra segun minister de Meza, e ora e ta bira un discusion publico mientras cu ainda nada no tabata oficialmente conoci sin ningun prueba. “Organonan hudicial mes a conseha nos pa busca mas informacion anto na momento cu e ta suficiente directo, e ora e indicacionnan ta mas fuerte pa nan por cana e caminda. Mi ta para tras di esaki tambe pasobra e tabata e caminda corecto cu bo conseheronan huridico ta duna bo tambe pa trata cu tipo di investigacionnan aki,” e ta comenta.

Abogado Benton Curtis
Abogado di Setar na Miami sr. Curtis no por a bisa mucho pasobra e ta envolvi den un caso cu a wordo deposita den corte federal na Miami, Florida. Si e kier a splica cu apesar cu bo tin como compania tur bo regla y policy na ordo – y Setar tabatin nan na ordo – bo ta haya hendenan den posicion halto manera sr. Koolman kende ta crea un fachada cu tabata indica cu e tabata sigui e reglanan. “Den nos pensamento cu hasta e miho y mas experencia controlador lo no a ripara esaki. E intencion di esnan cu ta comete fraude ta pa esaki nunca wordo detecta. Ta p’esey cu semper bo mester haci bo huiswerk bon y tin bastante prueba, sigur ora ta trata di un compania estatal, prome bay over na haci acusacionnan. Setar a tuma e pasonan corecto pa busca e servicio di un tercer partido independiente pa haci e investigacion interno. Esey ta loke a sosode den e compania y podise tin hende a pensa cu por tabata FBI, pero esey no ta e caso.”

Investigacion forensico
Minister de Meza a confirma cu e investigacion ta algo cu ta canando algun tempo caba y cu esaki a cuminsa na momento cu e Panama Papers a bin den publicidad y varios nomber di compania y personanan priva a keda publica. “Den e caso specifico aki nomber di un empleado di Setar a aparece riba e lista. E tempo ey mi a wordo informa dor di director di Setar y tambe door di Raad van Commissarissen cu nan ta bay start un investigacion. Durante e investigacionnan aki a bin dilanti cu ta parce cu cosnan no corecto por a tuma lugar. A sigui un analisis cu expertonan local y internacional. Setar na cierto momento durante e procedura a retira e persona di trabou.” De Meza a bisa cu tur hende por a tuma nota di e articulo cu a sali den Miami Herald cu mesora a bira un discusion publico. E minister ta lamenta cu tin politiconan ta haci sensacion cu e asunto aki. “Mi ta kere cu cualkier politico den aña 2017 mester sa hopi bon cu e tipo di casonan asina ta cosnan serio cu nos a tuma tambe cu hopi seriedad. Banda di esaki tin e procesonan cu mester cana.

Aki ta trata di un compania estatal di Aruba y nos lo kier a actua mas lihe, pero nos mester respeta e procesonan di investigacion. Nos abogadonan ta duna nos e consehonan ey tambe. Ora director di Setar y RvC a notifica mi di e caso aki, mi a sostene nan y a bisa nan cu e investigacion mester wordo haci den e forma mas corecto cu tin. Na fin di dia nos mester mira con recupera dañonan tanto material como inmaterial cometi contra e compania cu nos ta responsabel pe. Hunto y cu hopi cuatela nos ta trahando duro riba esaki.” Minister de Meza mas di un biaha a enfatisa cu director di Setar a cana e caminda corecto y cu e tin elogio pa esaki. “Loke a pasa ta inaceptabel y intolerabel y esnan cu a comete e fraude ta bay wordo poni responsabel pa loke nan a haci. Nan tin cu biba cu e consecuencianan.”


Roland Croes, director di Setar
Croes: “Loke nos kier a stress un bes mas como Setar ta cu di momento cu e asunto aki a bira conoci nos a tuma tur e pasonan cu un compania mester tuma pa haya sa mas lihe posibel kico ta pasando. Nos preguntanan tabata ‘con esaki tabata posibel y pakico un empleado di nos ta riba e lista ey.’ Aki ta trata si di un persona cu ta cumpra ekiponan pafo di e compania y nos no tin un bista riba dje cu ken e ta anda despues di trabou of banda di trabou. Ta pesey cu ta bon pa splica cu den Setar bo no ta wak e persona aki. Tur producto cu nos ta cumpra ta wordo paga. Pero ki sorto di deal of otro actividad ta tuma lugar cu otronan, nos no tabatin un bista riba dje. For di momento cu nos a mira su nomber riba e lista, nos a tuma e pasonan necesario.”