Spaña a mobilisa preventivamente pa analisa 30 container di carni cu a yega for di Brasil, pa motibo di e scandal cu a cuminsa na Brasil tocante un proceso di falsifica varios corte di carni  pa consumo humano, Ministerio di Sanidad a informa.  E container tabata transporta carni di empresa manera JBS y BRF, empresanan cu ta envolvi den e supuesto corupcion ora cu nan a pone make up riba carni cu tabata putri pa asina por bende cu nan clientenan.

“E ministerio a intensifica su accion riba carni cu por bin for di Brasil y cu te awor ta bao un control sanitario. Ami no sa cuanto kilo di carni exactamente tabatin den e  containernan pasobra ta diferente peso cada uno tin”, e vocero a bisa.

Desde cu polis di Brasil a revela un set up di corupcion,  unda inspector sanitario tabata haya soborno pa asina autorisa e comercio di carni venci, varios pais a cera of restringi  nan mercado pa producto di Brasil.

Tres dia despues di e scandal, 20 di maart, Union Europeo a solicita Brasil pa suspende exportacion pa 28 pais di e bloke Europeo pa cuatro empresa di freezer cu ta envolvi den e polemica.