(NLTimes) –Un miembro di famia di e sospechoso hefe criminal Ridouan Taghi a keda aresta ayera na e prison di maximo seguridad unda Taghi ta deteni wardando huicio. Taghi ta den custodia restringi y no ta permiti pa comunica cu ningun persona otro cu su conseheronan legal.

E homber, kende tambe ta un abogado, segun acusacion a yuda Taghi pasa mensahenan fuera di e prison pa continua manehando un operacion criminal, segun Ministerio Publico (OM) a bisa ayera.

“E comunicacion intercepta entre nan dos ta mustra cu T. probablemente ta organisando un huida violento for di prison”, OM a skirbi den un declaracion. E familiar di 38 aña di edad a keda aresta na e Institucion di Seguridad Extra (EBI) na Vught bao sospecha di participacion den un organisacion criminal cu meta di laba placa, trafica droga, y complot pa comete asesinato. Taghi ta e principal sospechoso den e Proceso Marengo, un huicio involucrando un serie di asesinato y intento di asesinato.

E homber di 38 aña di edad a keda aresta durante un bishita na e prison di maximo seguridad, OM a bisa. El a abusa di su posicion como abogado, pasobra den e capacidad ey e por a comunica cu su cliente, Taghi, y intercambia documento cu completo confidencialidad, segun OM. A logra regla esaki sin supervision di polis ni OM. E abogado a bishita Taghi na EBI decenas di biaha desde maart, y a yam’e cantidad di biaha.

Mediante contacto cu su pariente, Taghi a logra comunica sin impedimento cu mundo pafo, loke a permiti pa e continua su actividadnan criminal, segun OM. Adicionalmente, ta parce cu Taghi tabata purbando di obtene adres personal di trahadonan di sistema di prison. Servicio di Institucion Hudicial (DJI) inicialmente a nenga acceso di e abogado na EBI. E hefe di e Asociacion Nacional di abogado a examina e decision y a conclui cu no tabatin nada inapropia cu e solicitud aki. E ora a permiti e pariente bishita Taghi. A informa e presidente di e asociacion ayera. DJI a nenga di duna comentario.

A haci inval na e oficina di e sospechoso di 38 aña di edad na Utrecht ayera, igual cu na su cas na Maarssen. A tuma schrift, nota y aparatonan di data digital den beslag. Tambe a rista cel di Taghi den EBI. E sospechoso nobo ta bay presenta dilanti magistrado dialuna pa su prome audiencia.

Como resultado di e aresto, Gabinete Hulandes ta considerando reglanan mas estricto pa abogadonan di criminalnan serio. Sander Dekker, minister demisionario di proteccion local, a bisa cu e ‘kier examina esaki criticamente’.