Ministerio Publico su carta no ta un ‘sepotbrief’;decision pa persecucion penal te na september

E investigacion Avestruz cu ta dirigi su mes entre otro riba posibel actonan criminal cometi pa Oslin Benny Sevinger, ta den plena marcha. Asina Fiscal W.V Gerretschen a informa abogado di ex Minister Benny Sevinger, esta mr. David Kock.

Bon Dia Aruba a obtene e corespondencia entre Mr. Kock y Fiscal riba e investigacion y e rol di Sevinger.

Riba 11 di Maart e aña aki, abogado Kock a manda un carta pa informa un biaha mas cu e ta representa sr. Oslin Sevinger. Den e carta e ta splica cu na october 2019, tabatin e prome buskeda hudicial unda a bira cla pa Sr. Sevinger cu a cuminza un caso penal contra su persona. For di inicio, e cliente, esta ex-Minister Sevinger a duna di conoce di ta dispuesto na tur momento, pa duna su declaracion a base voluntario. Tur esaki mientras cu Sevinger ta enfatisa cu e no a haci su mes culpabel na ningun asunto criminal cu tin poni su dilanti. Te cu maart 2021, Ministerio Publico no a yama Sr. Sevinger pa un conversacion pa asina e por duna su declaracion, apesar cu un biaha mas a busca mas informacion cerca entre otro e mesun Minister. Manera ta conoci, Ministerio Publico a haci un entrada hudicial e aña aki na cas di e ex-Minister.

“Entretanto a pasa 17 luna desde cu a informa cliente cu e ta someti na un persecucion penal, mientras cu e ta un hecho cu mi cliente ta un politico y cu aki seis luna lo tin eleccion,” David Kock a bisa den su carta na maart. E carta a sali prome cu Gabinete Wever Croes 1 a entrega su retiro. “Cliente a mira cu esakinan ta circunstancianan hopi special y como tal tin derecho y interes cu e sea awor of mas liher posibel ta haya su citacion of cu ta para cualkier investigacion penal contra su persona,” Kock a skirbi den su carta.

Como tal, David Kock a puntra Fiscal pa no mas tarda cu 25 di Maart 2021, informa kico ta e decision di Ministerio Publico. Si esaki no sucede, cliente lo bay Corte pa asina determina un termino den cual e lo mester keda cita pa Ministerio Publico of cu di otro banda, mester considera cera e caso contra su persona.

Ministerio Publico a contesta riba 17 di maart y e carta tabata relativamente cortico. Den e carta Fiscal Gerretschen ta informa mr. David Kock cu e investigacion Avestruz, cu ta dirigi entre otro riba posibel actonan criminal cometi door di ex-Minister Sevinger, ainda ta andando. Particularmente e inventarisacion y analisis di e documentonan administrativo, tanto fisico como digital ta tuma tempo. E fiscal a splica cu e investigacion ta tumando lugar cu un capacidad limita di Landsrecherche y cu e pandemia di COVID-19 a produci un retraso den e proceso, cu a nifica un retraso.

Pero, otro cu locual e abogado ta bisa den su carta, Ministerio Publico no a cuminza un procedura penal contra Benny Sevinger. E investigacion ainda ta den e fase di deteccion y buskeda. Landsrecherche, apenas despues di scucha tur testigo y sospechoso lo compila un expediente y presenta esaki na Ministerio Publico. E ora ey, Ministerio Publico lo tuma un decision riba cualkier posibel persecucion penal. Es mas, Ministerio Publico no ta kere cu e decision pa persigui lo cay prome cu september 2021, ta locual a informa abogado di Benny Sevinger, mr. David Kock. Contrario na loke tabata circula como comentario, e contenido di e carta di OM di ningun manera ta un asina yama ‘sepotbrief’ cu ta duna ora OM cera e caso sin persecucion.

Mientrastanto, e sospechosonan deteni den e ultimo dianan aki ta reparti entre e diferente wardanan di polis. E ex-locutor L.A en particular, ta deteni na Warda di Polis na San Nicolas.