Crea un Academia pa nos huristanan por specialisa den traha conceptonan di ley, ta un proyecto cu Minister mr. Andin Bikker tabata boga p’e pa hopi aña. Pasobra Minister Andin Bikker a constata cu tin scarsedad di huristanan cu e specialismo ey, mientras cu practicamente tur area di sociedad ta reglamenta door di ley y tur plan di gobernacion ta encera introduccion di leynan nobo of cambio di leynan existente.
Segun un comunicado di prensa, ta p’esey e ta considera leynan como ‘software’ di un pais caminda cu e ‘speed of Government’, esta con lihe un gobernacion por resolve retonan cu ta rekeri cambio di ley, ta depende di e cantidad di huristanan specialisa pa traha ley cu e pais por conta cu ne. Den e cuadro ey, desde presupuesto di aña 2018, Bikker a pone como un prioridad di maneho, creacion di un academia asina.
Ora cu el a asisti na inauguracion di ‘Caribbean Center for Legislation’ di Universidad di Corsou, un iniciativa cu ayudo di BZK di Hulanda, Minister Bikker a propone pa institui un ‘Aruba Desk’ di e Center for Legislation y asina establece un cooperacion cu Ministerio di Husticia di Aruba, Universidad di Aruba y Departamento di Legislacion di Aruba (DWJZ). Tambe el a propone pa e Aruba Desk lidera un grupo di trabou pa traha riba un concepto di ley concordante pa ‘Administratief Procesrecht’, loke ta un deseo expresa pa Corte Comun pa basta tempo caba. A base di dicho proposicion, cooperacion cu e Caribbean Center for Legislation di Universidad di Corsou, pa medio di e Aruba Desk, a bira un realidad.
Na september 2020 e lesnan a inicia online y diabierna ultimo e prome grupo di huristanan cu a sigui e curso specialisa, a gradua como ‘Certified Legislative Lawyer’. E curso a start cu 47 participante di Corsou, Aruba y Sint Maarten y na final 40 a gradua. Di 21 participantenan di Aruba, 18 a keda cla y 2 tin e oportunidad pa pasa “her” pa ainda ricibi nan diploma. E participantenan di Aruba cu a gradua ta: Helena Croes, Milko Baiz, Anouk Balentina, Vivian van der Biezen, Carlos Guiamo, Indra Duarte, Mireille Henriquez, Kitty Obergh, Giovanni Jacobs, Carondina Leijdekkers, Amanda Maduro, Jeannine Marsman, Zamira Paesch, Ilona Sneek, Valerie Wanga, Wendy op de Weegh, Margarita Werleman y Jessica Winterdaal.
E ceremonia di graduacion cu a tuma luga online, a wordo inaugura door di Minister-President di Corsou, Gilmar Pisas. Minister-President Pisas a duna un palabra di pabien na tur e graduadonan y na Universidad di Corsou cu e Caribbean Center for Legislation y a gradici pa e sosten y cooperacion duna for di Aruba y Sint Maarten. Minister-President a subraya, a base di su experiencia tempo e tabata den Parlamento, e importancia di por tin mas huristanan specialisa pa traha conceptonan di ley y a expresa cu Gobierno di Corsou lo sigui duna sosten na e iniciativa di cooperacion entre e islanan.
Bikker na su turno tambe a felicita tur e cursistanan, subrayando cu tin graduadonan di Aruba cu a resalta graduando ‘Met Genoegen’ y ‘Summa Cum Laude’. Minister Bikker a uni su mes na palabranan di gradicimento pa e cooperacion duna door di Universidad di Corsou, Caribbean Center for Legislation y e sosten duna for di Aruba, Corsou, Hulanda y Sint Maarten. E la gradici Profesor Zijlstra y dr. Flora Goudappal, decano di facultad di ley di Universidad di Corsou, pa nan cooperacion. Di su banda tambe el a expresa cu e ta sigur cu Gobierno di Aruba lo sigui duna sosten na e iniciativa di cooperacion entre e islanan, pa asina sigui aporta pa por tin mas hurista specialisa pa prepara leynan y asina modernisa nos legislacion.
Profesor di ‘Wetgevingsleer’, Sjoerd Zijlstra, un di e fundadonan principal di e Center for Legislation y un di e motornan grandi tras di e proyecto di cooperacion, tabata orguyoso di por menciona cu entre e participantenan 7 a logra un “judicium”. Cuater a termina nan estudio cu e judicium “Met Genoegen”, cu ta encera cu nan punto final ta un averahe di 7,5 y nunca a haya un punto mas abou cu 7. Entre esunnan cu a logra esaki, dos ta di Aruba: Milko Baiz y Carondina Leijdekkers. E judicium ‘Cum Laude’ a bay pa un participante for di Corsou. E judicium maximo di ‘Summa Cum Laude’ a bay pa dos participante for di Aruba. Ta trata aki di Ilona Sneek y Valerie Wanga. Pa caba e curso cu e judicium aki, ta nifica cu nunca a haya un punto bou di 8,5 y un averahe di 9. Bale la pena informa cu den e caso di Valerie Wanga, e no kier a core ningun risico, pasobra el a logra puntonan manera 9,5 y nunca bou di un 9, cual a wordo considera como un “werkelijk een verbluffend resultaat”.
Profesor Zijlstra tambe a reconoce esfuersonan di Minister Bikker: “Een bijzonder woord van dank aan minister Bikker, voor zijn niet aflatende ijver om te streven naar een goede wetgevingsopleiding, en zonder wiens inspanningen het niet was gelukt.”.
Segun e comunicado, Bikker ta masha contento mes cu e logro aki, pasobra despues di su esfuersonan como Parlamentario y awor como Minister di Husticia, a logra aporta na un esfuerso conhunto di cooperacion concreto y duradero entre e islanan, treciendo asina un solucion practico pa henter e parti Caribense di Reino Hulandes.
E otro bon noticia ta cu otro siman dia 1 di september e di dos curso lo cuminsa, unda atrobe un grupo for di Aruba lo bay amplia nan conocemento di ley pa por gradua como ‘Certified Legislative Lawyer’.
