Hopi reaccion a sigui despues di e ultimo anuncio y entrega di e acuerdo di gobernacion na Gobernador siman pasa. Aki a duna di conoce cual ta e ministerionan cu a acorda, aunke cartera importante manera turismo, tambe energia, a keda sin asignacion na un persona. Pregunta ta anto si ta usual pa entrega trabao no termina na Gobernador? No, pero como cu Gobernador no por reacciona, palabra ta na e Formador pa splica. Esey na su debido momento.

Hopi atencion por cierto a bay na e composicion poco usual di e ministerionan, unda mas cu na otro momento den pasado e combinacion di cartera a parce di a perde strea di Nort. Di otro banda mester bisa cu e custumber di combina cartera segun conveniencia politico no ta nada nobo. Despues di 1986, unda ainda a conforma ministerionan den e promer ley di institucion di ministerio segun un cierto logica, unda tabata mira ainda e man experto di esnan e tempo ey envolvi den preparacion di ley, despues e ‘realpolitik’ di e partidonan a tuma rienda y e cambionan den e ley a cuminza mustra manera un tipo di ‘grabbelton’ unda cada politico cu dentro di su partido a yega na e grado di ‘big dog’ cu mester haya recompensa como ministro, ta laga su voz resona pa loke e kier haya.

Sin embargo, ta keda un hecho cu e biaha aki e reparticion di cartera a haya un toque mas straño ainda, cu ta parce di ta principalmente na fabor di e partido grandi den e proximo coalicion. Si esey ta asina, lo mester resulta di e practica gubernamental den e proximo luna y añanan, en todo caso nos no ta sinti ningun necesidad pa lamenta cu e partido eventualmente, manera hopi ta bisa, no a haya ministerio asina fuerte y cu gran parti di e aparato publico lo ta firmemente den man di e ministronan di e partido grandi. Si esey ta berdad, ta nan mes a sinta na mesa durante dos luna pa defende nan propio interes, y si nan no a hacie bon, ‘so be it’.

Esey sin embargo no ta kita e obligacion di tira un vista riba e peculiaridadnan mas ehemplar di e caso. Manera e asignacion di e cartera di Infrastructura y Planificacion na Promer Ministro. Por pensa cu a haci esaki pasobra tin problema grandi den e departamento ey, cu un investigacion penal tumando lugar den cual tin sospecho di envolvimento di e top di e departamento, y cu e promer mandatario mes kier maneha e asunto. E hechonan bao investigacion, segun nos informacion, ta di fecha recien y no tin di haci cu e pajaritonan cu Ministerio Publico a saca for di vuelo caba. Y ken tabata dirigi e departamento despues di salida di e actual lider di MAS? Si tin otro splicacion pa e escogencia remarcable aki, nos lo scuch’e cu gusto.

Pa pasa pa e caso di e ministerionan cu partido RAIZ lo haya; por ripara cu nan no a haya ningun ministerio di peso, y dentro di nan ‘paquete’ tin algun ‘cartera cu no tin cartera’. Kico pensa por ehemplo di tema, mas bien, manera ‘integridad’ o ‘desaroyo sostenible’ cu ta parce loke na Hulandes nan ta yama ‘gebakken lucht’. Te awor nos no a mira mucho mas cu lanzamento di grito y consigna den e asuntonan aki, ni a mira e expresion organizativo di nan. Tambe e cartera ‘Naturaleza’ ta haci e pregunta surgi unda e tema ‘Medio Ambiente’ a keda y bao cual ministerio finalmente e actual Directie Natuur en Milieu (DNM) lo bay cay. Cu tempo cu DNM tabata cay bao Infrastructura y Planificacion mes, nan coleganan di DIP tabata caso omiso di nan opinion; con esey lo bay awor?

Tambe e partido chikito lo haya Asunto Economico, sin Turismo, loke ta garantiza continuacion di un maneho mancaron di nos economia, nada nobo ey. Banda di esey e partido ta haya ‘Cuido di hende grandi’ como tema separa, mientras otro cartera cu fuerte relacion cu e tema (asunto social, cuido medico) ta organiza na dos otro ministerio diferente. Nos ta curioso pa scucha e ‘logica’ tras di e decisionnan aki.

Otro tema ta e ‘superministerio’ di Husticia, Asunto Social y Labor. Husticia riba su mes ta hopi grandi caba, normalmente ta reuni mas di mil di e empleadonan publico caba. Kico Labor ta haci eyden? Nos por imagina cu lo kier a pone trayecto di permiso di residencia relaciona cu Labor den un man, pero cu ki meta? Pa mehora? Riba su mes esey no ta garantiza mihor maneho, ni menos corupcion, mientras te awe nos no a tende nunca di medida pa mehora e proceso y atende corupcion na un manera contundente. Es mas, si no tene cuidao, por surgi hasta menos transparencia cu ta existi awor.

Sin embargo, a pesar di e critica aki riba e poco informacion cu a laga bay te awor, envez di un splicacion drechi di un solo tiro, esaki ta solamente e reparticion di cartera y no ta bisa nada ainda di contenido: kico concretamente ta bay haci riba cada tema y, importante, tin placa pa esaki? Nos por comprende cu nos lo ta bon na caminda pa Pascu y Aña Nobo promer nos haya sa kico realmente ta bay sucede, pa no papia mes di presupuesto 2022.

LEAVE A REPLY

Please enter your comment!
Please enter your name here