Diabierna merdia a surgi un noticia hopi lamentabel cu a consterna comunidad. Riba di dos dia cu ta permiti pa tira klapchi, ya a registra e prome accidente grave. Mas impactante ainda ta e hecho cu e victima ta un mucha di apenas 4 aña. Su mayornan mes a yega na sala di emergencia di hospital buscando prome auxilio, y fuera cu e mucha a keda interna, no a logra obtene mas informacion for di fuentenan oficial.

Diferente medio di comunicacion a informa cu e mucha, di inicial O.F., su man a keda destroza pa e impacto di e klapchi. Na hospital el drenta sala di operacion inmediatamente caminda specialista ciruhano dr. Howard van Niel a atende e caso. Posteriomente a bira conoci cu no por a haci mucho p’e y el a perde cuater di su dedenan.

E noticia a genera hopi reaccion, inicialmente e inkietud riba falta di supervision di parti di mayornan. Sin embargo, den oranan di atardi, e redaccion aki a ricibi informacion cu no ta e mucha su mes tabata manehando y cendiendo klapchi. E version aki ta bisa cu ta mas bien un bisiña esun cu lo a cende un klapchi y tire na laira, pero cu e klapchi a cay na e cura caminda e mucha tabata. Na cierre di e edicion, no por a confirma e informacion aki.

Den ambos caso, ta bin e pregunta dilanti di ken ta para responsabel pa e desgracia aki. Un situacion asina, na paisnan desaroya, ta pone autoridadnan hudicial tuma carta den asunto pa mira si ta trata di mucha poni na peliger (child endangerment) of un acto iresponsabel (reckless act) pa cual tin castigo.

Pareu na esaki Bon Dia Aruba ta uni su mes na mensahe di conscientisacion di diferente instancia, for di Cuerpo di Bombero, Cuerpo Policial, Departamento di Salud Publico y Hospital, entre otro, pa practica hopi precaucion ora di bay cende klapchi durante e dianan aki. Pa cu esaki tin un guia cu ta indica e uzo corecto di klapchi y prevencion di accident, e ta disponibel riba www.despa.gov.aw ademas di un poster cu mester ta visibel na tur punto di benta di klapchi.

E sucedido lamentabel cu e menor ta bin hustamente un dia despues cu Minister di Husticia mr. Andin Bikker a anuncia su decision pa extende e periodo den cual por tira klapchi cu un dia mas, te 2 di januari, ademas di 6 di januari. Un decision cu a haya basta critica den transcurso di ayera y for di mas cu un fraccion den Parlamento.

Tambe organisacionnan pa proteccion di animal, y te hasta e propio miembronan di Comision di Vuurwerk a expresa nan mal contento, manera por a tuma nota den diferente medio social. Administrador di e pagina ‘Lost & Found Pets Aruba’ a duna di conoce na corant Amigoe cu e denuncianan di mascotanan perdi of a haya a bay di 2 a 3 pa dia, te na 15 pa 20.