Un luna despues di e nacemento di e prome babynan cu genenan edita na China, un encuesta di Associated Press-NORC Center for Public Affairs Research a mustra cu hende ainda ta dividi entre e promesa medico di un tecnologia suficientemente poderoso pa altera herencia humano, y preocupacion si esaki lo wordo uza di un forma etico.
Edicion genetico ta manera un programa biologico di ‘cut-and-paste’, cu ta permiti cientificonan pa corta un pida di DNA pa kita, reemplasa, of repara un gene. Alteracion di celnan adulto lo afecta unicamente e pashent cu ta wordo trata.
Pero edicion genetico den ovula, sperma of embryonan lo por altera e mucha den maneranan cu lo por wordo pasa pa generacionnan futuro – un stap cu implicacion asina profundo, cu reglanan cientifico ta bisa e no mester wordo test den embarasonan humano te ora mas investigacion basa den laboratorio determina cu ta sigur pa purba.
E encuesta di AP-NORC ta mustra cu como 7 di cada 10 Mericano ta na fabor di algun dia uza tecnologia di edicion genetico pa preveni malesa fatal of incurabel cu un mucha lo hereda, manera fiborsis cistico y malesa di Huntington.
Como dos tercera parti di Mericanonan tambe ta na fabor di edicion genetico pa preveni un mucha di hereda un condicion cu no ta fatal, manera nace ciego, y hasta reduci e riesgo di malesa cu por desaroya mas laat den bida, manera cancer.
Tin posibel efectonan secundario, manera un intento di edicion genetico cu accidentalmente ta altera e parti fout di DNA, y e encuesta a haya cu 85 porciento ta pensa cu e riesgo aki ta, sikiera, un poco probabel.
Pero shete di cada dies Mericano ta opone e uzo di edicion genetico pa altera capacidadnan manera inteligencia of talento atletico, y pa altera caracteristicanan fisico manera color di wowo y largura.
E encuesta ta mustra cu si edicion genetico di embryonan algun dia bay den clinicanan di fertilidad, lo tin decisionnan dificil tocante ki problemanan no fatal ta cualifica pa esaki, segun bioethicista di Columbia University, dr. Robert Klitzman. Si cientificonan identifica genenan relaciona cu depresion, autismo of obesidad – lo ta bon pa edita esaki?
E encuesta ta mustra cu mayoria di persona ta pensa cu ta sikiera un tiki probabel cu edicion genetico lo por caba cu cierto malesa hereda, y hiba na otro avancenan medico. Sinembargo, a pesar di e entusiasmo medico, mas Mericano ta opone financiamento gubernamental pa test riba embryonan humano pa desaroya tecnologia di edicion genetico – 48 porciento contra, y 26 porciento na fabor.
Locual e encuesta ta resalta ta un falta di confiansa den ciencia: como un tercera parti ta pensa e tipo di edicion genetico aki lo wordo uza prome cu e wordo test di forma adecua, manera hopi cientificonan ta bisa a pasa na China. Casi 9 di 10 persona ta pensa cu e tecnologia lo wordo uza pa motibonan no etico, incluyendo un 52 porciento cu ta bisa esaki ta hopi probabel.
Finalmente, como 75 porciento di Mericanonan ta bisa cu edicion genetico probablemente lo no ta accesibel pa un persona normal – resultando den cierto malesanan birando un problema unicamente pa hendenan di menos recurso.
