Ayera mainta, loke tabata inicialmente un conferencia di prensa di FTA, a bira un accion di protesta di un grupo di trahado di aeropuerto afilia na e sindicato menciona.

E tabata un accion di protesta di 1 ora caminda dirigente nan di FTA, Hubert Dirkzs, abogado Hose Figueroa y Rudy Geerman a vocifera nan mal contento den nomber di e trahadonan contra gerencia di Triple A su decision di reduci personal den cuadro di un reorganisacion.

Pero tambe FTA a protesta contra Triple A su proposicion pa duna pakete di retiro cu mester ta uno boluntario, pero nan ta sinti cu mas bien gerencia di e compania estatal practicamente kier impone e trahadonan acepta e pakete di retiro aki. Un pakete cu nan ta considera nada atractivo ni husto pa e trahadonan.

Accion

Si FTA ta consciente di e tipo di accion di protesta aki, mirando tur esfuerso cu ta wordo haci pa purba reactiva nos economia, vice presidente di e sindicato aki, Hose Figueroa a bisa cu FTA a tuma cuenta cu esey. “P’esey hustamente a scoge pa e orario aki,” el a bisa. El a agrega cu tambe den e momento ey Triple A tabata teniendo un Webinar cu su trahadonan, y niun hende tabata trahado na e momento ey. “Nos a scoge un ora unda e ta afecta na lo minimo posibel…” el a bisa.

E accion di protesta tabata pa 1 ora y FTA tabata na expectativa di reuni cu hunta di comisario di Triple A. Presidente di FTA, Hubert Dirksz tabata na spera cu despues di e reunion, y apesar di e diferencia cu tin entre e dos partidonan, nan por yega na otro. Si e trahadonan ta insisti cu nan no ta acepta e pakete di retiro cu Triple A ta ofrece, FTA ta kere cu gerencia di aeropuerto mester haci esfuerso pa reubica e trahadonan den nan posicion bek. Tambe pa Triple A aplasa nan plan di reorganisacion pa un periodo di 1 aña mas, y despues bin bek cu otro plan di reorganisacion, ora cu e situacion ta mas miho pa no ocasiona efecto grandi riba e trahadonan.

Reorganisacion y protocol

FTA no tin un bista cla riba Triple A su plan di reorganisacion. Dirksz a bisa cu nan a wordo splica riba dje. Pero a keda hopi pregunta sin contesta, vooral riba e detayenan. Nan no tin un lista di e cifra y nomber cu Triple A lo kier ofrece pakete di retiro, y tampoco di e respectivo departamentonan, unda nan tin pensa pa reduci personal.

El a declara cu esaki tabata un accion di protesta pa ‘mustra compania cu nos no ta contento manera nan ta procede. Nan mester ta mas husto cu e trahadonan pa yega na un acuerdo mas rapido cu ta posibel.’

FTA a dicidi di bin cu e accion di protesta pa motibo cu despues di hopi intento pa lunanan largo cu nan ta trata pa yega na un acuerdo, pero te ainda nada. Nan a yega di sinta cu gerencia di hunta di comisario di e compania estatal aki cu ta maneha aeropuerto pa asina compronde cu e crisis di Covid a afecta e compania, y cu mester bin cu medidanan di austeridad, y cu nan lo wordo implementa na diferente nivel y fase.

Den e prome fase, el a bisa cu FTA a confronta gerencia debi cu nan kier bin cu medidanan pa kita e trahadonan cierto beneficionan si e no ta trahando debi na e pandemia, durante e temporada di lock down. Nan mester firma un protocol. Mientras el a reaccion riba sindicato STA, cu tambe ta representa gran parti di e trahadonan riba protocol di pakete di retiro, locual STA ta bin señala no ta berdad, segun sindicalista Dirkzs.

Ademas FTA ta totalmente contra e protocol aki, ya cu nan no ta hay’e husto. Ademas e no ta duna garantia. “Si bo number ta sali bo tin cu bay,” segun Dirkzs. Den e proceso ey un grupo di casi 40 hende lo cay afo. Mientras cu ya caba un grupo di alrededor di 27 trahado a acepta pakete di retiro.

El a aclaria cu locual FTA a bisa ta cu niun medida ta wordo implementa, si no tin un acuerdo. “Nos a discuti hopi riba esaki, y berdad nos no ta yega na acuerdo nunca,” el a bisa. Despues gerencia di aeropuerto a bin cu su plan di reorganisacion pa haci e compania miho cu menos hende, bahando gasto y haciendo mas eficiente. FTA tin comprension, pero e ta haya cu esaki no ta e momento, manera cu e ta debi na Covid crisis, pa retira trahadonan. Nan kier pa e proceso ta mas transparente y no laga e trahadonan wordo perhudica.

Pakete

FTA ta propone, si ta factibel, pa bay di acuerdo cu un miho pakete posibel cu ta keda boluntario, y nada obligatorio. “Compara cu loke a wordo firma cu otro sindicato y cu ta firma riba protocol como obligatorio,” el a bisa. Pues den e caso aki FTA ta haya cu gerencia di Triple A no ta hues y tampoco e trahado no a haci nada malo pa bay cas. Pero e punto den e protocol ta cu si e trahado no ta acepta pakete, e compania ta bay corte, y pidi pa e trahado haya 50% di loke tin ariba mesa. Presidente di FTA ta insisti cu e aceptacion di e pakete mester keda boluntario.

Conflicto sindical

Igualmente -segun presidente di FTA- nan a purba di diferente manera pa haya sindicato STA acerca den e mesun mesa di negociacion, pero na niun manera nan no por a haya dos sindicato hunto. “Pasobra si tabata e caso, kisas aworaki nos no tabata para akinan. Nos lo por a yega na un acuerdo miho,” el a declara.

E sindicalista a splica cu ora FTA a pidi pa un pakete y proceso husto, nan ta haya cu Triple A a bin cu proposicion demasiado abao. Mientras cu e STA a acepta casi di biaha cu e proposicion aki cu e compania a bin cun’e. “E distancia entre compania cu nos ta hopi grandi. Mientras cu e distancia entre compania y otro sindicato ta hopi cerca,” el a bisa.

E lider sindical a laga sa cu nan ta compronde e situacion dificil aki pa tur compania, pero tanto e medidanan, pero tambe e situacion ta varia den cada compania. Apesar cu Triple A ta un compania cu a resulta afecta directamente pa e caida di turismo. Sinembargo FTA ta considera cu e ta un compania financieramente fuerte y cu un socio strategico, esta Schiphol. Ademas nan ta wak cu Triple A ta un compania cu unabes e situacion di reapertura di turismo lo sigui, aeropuerto ta bay dilanti prome.

Esaki a pesar cu gerencia di Triple A, a yega di informa e sindicatonan cu un reorganisacion ta necesario cu Covid of sin presencia di e virus aki, FTA ta considera cu “Covid no mester carga e cacho” pa esaki. Aunke nan ta reconoce cu e situacion di e Covid a haci e situacion mas dificil.

Pero un propuesta di retira trahado den e situacion actual ta nifica -segun Dirkzs- cu e trahadonan mester bay cas sin mas entrada. Mientras cu e placa cu nan por a haya pa medio di e pakete di retiro lo caba. Na momento cu bo ta keda sin trabao meymey di e crisis, den e caso aki, ta dificil pa haya trabao bek y bo ta perde un entrada substancial. Den e caso aki FTA ta haya cu e trahado mester haya un pakete di retiro mas husto y miho posibel. Esaki ta e punto crucial cu e negociacion entre FTA y Tiple A, a pega.

FTA a yega di sinta cu gobierno y parlamentarionan, caminda nan a yega di comunica cu gerencia di Triple A, pero gerencia no a coresponde manera mester ta cu nan. E sindicato ta lamenta esaki, pero nan ta distancia di e situacion aki, ya cu esaki ta un asunto entre gobierno, hunta di comisario, Parlamento y gerencia.

 

 

LEAVE A REPLY

Please enter your comment!
Please enter your name here