Departamento di GKMB (Gele Koorts en Muskieten Bestrijding) a duna un splicacion pa locual ta trata accion cu ta tumando luga, pa e medling cu ta haya despues cu tabatin temporada di yobida.

Inspector di GKMB, Dionisio Richardson a comparti cu varios siman atras a cuminsa traha ora extra, pa motibo cu yamada y keho grandi a cuminsa drenta den departamento pa molester di sangura.

E departamento a dicidi cu lo extende e orario di trabou y asina por baha e cantidad di yamada pa trece un alivio den comunidad, pa locual ta trata e molester y keho cu ta drenta.

Sinembargo Richardson ta bisa cu e yobida a baha basta. Esey ta pone cu e keho tambe a baha, pero ainda tin e molester. Richardson si ta pidi pa comunidad coopera y haci nan parti. No pa keda depende di e departamento so.

Si persona ta wak cu den yerba ta forma pleki di awa, pa hende por ta atento riba esaki, ‘semper nos ta boga riba e mesun topico’. E ta bisa cu tur hende por coopera pa motibo cu ‘nos so no por haci henter e trabou’.

A puntra Richardson cua ta e bario mas afecta durante e ultimo tempo. E ta bisa cu no por bisa cla, pasobra ta full rond di Aruba ta ricibi melding. “Nos ta haya yamada diariamente, anto por bisa cu henter e isla ta afecta. No por bisa cu bario ta mas cu otro, pero henter isla tin e problema.”

E sushedad rond di Aruba, Richardson ta enfatisa cu hende mester ta consciente di locual tin rond di nan cura of nan cas. Nan ta splica cu detaye kico por haci rond di cas. Di e forma aki tur por coopera y evita molester di sangura cu ta causa e virus dengue, Chikungunya, Zika.

Richardson ta remarca cu mester tene cuenta cu sangura ta djis biba pa tiki tempi y ta muri si no tin awa pa sigui pone webo ‘nan mester awa pa sigui reproduci’. Pa locual ta trata e parti di spuit cu pick up, ta e ultimo stap cu nan ta uza.

Actualmente ta atacando yamada, pero ta sigui comparti e mensahe pa no pasa door di e malesa menciona mirando cu na Aruba tabatin hende cu a haya e virus. E parti di prevencion ta importante.

“No djis coy telefon y yama. Ta conseha tur hende pa cana rond di nan cas pasobra kico ta pasa hopi ta yama cu keho largo cu ta bisiña of otro cosnan. Pero ora cu departamento bay na nan cas ta ripara cu nan mes ta esun cu tin criadero y no e bisiña”, e ta expresa.

Segun Richardson esey ta pasando mucho y ta un parti fastioso di e melding. Ta duna advertencia cu den e proximo control cu lo haci cerca e persona, lo pone boet si ‘esey ta pasando awo’.

Pa hende tene cuenta cu esey awo. E parti di pick-up cu ta core rond, cu e spuit ta e ultimo recurso. Pa motibo cu e spuit mester tene cuenta cu medio ambiente, tin baby recien naci, persona mayor di edad y otro cosnan cu por afecta sea pa bestia of persona alergico. No por cuminsa spuit manera antes y mester tene consideracion cu por tin efecto riba cosnan.

Tambe teniendo na cuenta cu si spuit mucho biaha, sangura por bira immuun na e insecticida. Pa e motibo ey ta cada periodo ta keda cambia pa asina por tin efecto riba criadero pero mester tene cuenta con fuerte e insecticida ta.

Agregando cu si tambe spuit cada 3 bes pa siman, pero e persona no haci un cambio na e criadero cu nan mes tin, sangura lo keda reproduci y no lo drecha e problema cu tin den nan mesun cas.

A puntra Richardson cuanto e ta dura pa e GKMB bay controla na hende su cas? E ta bisa cu tin un lista largo cu por dura un dia pa dia y mey. Si un melding drenta awe, nan lo controla e siguiente dia. Maximo un dia extra, pero no mas cu esey.

Tambe ta pidi pa esunnan cu tin pos, pa check pa e tapa ta bon cera, aunke esey ta un otro tipo di sangura, pero tambe por causa molester den ora di atardi/ anochi.

Pa cualkier molester of keho semper por tuma contacto cu e departamento pero Richardson ta enfatisa pa prome cu haci esey coopera cu nan y ‘controla prome rond di bo cas’ si mira algo por uza kerosin of diesel pa alivia e problema.

 

 

LEAVE A REPLY

Please enter your comment!
Please enter your name here