Diamars mainta, Prome Minister Evelyn Wever-Croes tabatin e honor di habri e di dos German Energy Conference cu un discurso enfatisando loke Gobierno di Aruba ta haciendo riba e tereno di energia.

Gobierno di Aruba aña pasa a wordo acerca pa Camara di Comercio di Alemania cu e peticion pa organisa un mision comercial na Aruba riba e tereno di energia. Esaki ta e di dos aña consecutivo cu nan ta bin cu un grupo grandi di inversionista cu interes den Aruba na unda cu nan por a intercambia cu nos inversionistanan local. Mas di 100 persona a asisti na e conferencia aki cu ta brinda oportunidad nobo pa Aruba riba tereno di economia y di energia.

Gobierno di Aruba ta trahando estrechamente cu stakeholders di sector publico pa defini metanan nobo di energia. Recientemente, tabatin un Cumbre di Energia.

Meta principal di e cumbre aki tabata pa discuti e metanan nobo di energia pa Aruba. Gobierno di Aruba, desde cu el a sinta, a cuminsa recalibra su vision di energia. Hopi lihe a resulta cu e vision pa Aruba bira 100% independiente di fossil fuels no tabata wordo carga pa tur stakeholders, y tampoco tabata realistico na e momento.

Gobierno a haci un peticion na tur stakeholders pa alinea nan vision cu metanan cla, cu ta cumpli mas tanto posibel cu palabracionnan internacional, pero cu ta principalmente realistico y pagabel pa e companianan, pa Gobierno y pa pueblo di Aruba.

Cu esaki tambe Aruba lo ta den mesun liña cu e Metanan (Mundial) pa Desaroyo Sostenibel, e asina yama ‘Sustainable Development Goals (SDG’s)’ di Nacionnan Uni. Mas ainda, na e recien Assamblea General di Nacionnan Uni e topico di Cambio di Clima tabata na e top di e agenda. Un cantidad di pais a comete nan mes pa yuda combati cambio di clima door di reduci nan emisionnan. Aruba tambe tin intencion di bay comete su mes na metanan realistico.

Sector di energia ta importante, no solamente pa motibo di sostenibilidad, pero pasobra e ta afecta henter nos pais. Entre otro sector di energia ta impacta habilidad di nos hendenan pa por paga necesidadnan basico manera awa y coriente. Sector di energia ta afecta nos economia den su totalidad – e tin un impacto macro economico; riba inflacion, balansa di pago y reserva di divisas. Y sector di energia ta afecta nos medio ambiente y e tin impacto riba cambio di clima. Tur esaki lo tuma den consideracion pa desaroya e vision y maneho nobo di energia.

“Hunto cu stakeholders, Gobierno ta trahando pa desaroya e plannan nobo cu e obhetivo pa publica e vision y metanan di Gobierno na final di e aña aki y presenta e vision nobo di energia na Parlamento y na comunidad. Nos maneho di energia ta experimentado un reforma fundamental y nos sistema di energia lo ta mara na innovacion. Nos ta comprometi pa haci nos parti, awor comunidad internacional mester haci su parti”, Wever-Croes a duna di conoce.