‘Nan ta take and take solamente, mientras ta give and take e mester ta’, asina un grupo di trahado di waf hunto cu sindicato STA ta conta Bon Dia durante un accion unda trabou a bay plat na waf, lagando chauffeurnan di truck para pafo di e entrada.

Segun gerencia ayera tabatin un barco ‘basta grandi’ y p’esey e accion lo tin su consecuencianan.

E trahadonan di waf cu ta representa pa sindicatonan STA y UPA a bini hunto ayera atardi pa expresa nan malcontento pa e manera con gerencia di Astec ta bin ta trata nan ultimo tempo. E accion aki tin como meta pa pone Astec sinta na mesa cu e trahadonan pa negocia un contract colectivo (CAO) nobo, mirando cu e CAO anterior segun e trahadonan y STA ta duna gerencia tur e poder pa haci loke nan kier.

Dave Franken hunto cu Jamiro Dijkhoff kende ta trahadonan na waf di Barcadera a bin dilanti bisando cu pa 5 aña largo nan no a haya un CAO nobo, desde cu gerencia di Astec a cambia. “Di nos banda nos tin tempo ta purba tira awa den biña pero di parti di gerencia nan no kier tende nada. Nan kier bisa cu esaki tin, esey bo mester tuma. Pero ora di negocia tur cos mester bin di ambos banda.”

Esaki ta un prome accion cu segun sr. Franken si no logra pa pone Astec sinta na mesa cu e sindicatonan y trahadonan e ora ey ‘lo por bay mira cu despues di tempo e barco no lo bay traha mas mainta’. Sr. Franken ta expresa cu di parti di e trahadonan ta mira cu regularmente gerencia ta kita beneficionan cu trahadonan di waf ta haya, pues ta bay sinta pa wak cuanto tempo lo duna gerencia pa reacciona.

Entre otro nan a baha aumento pa 0,75, segun sr. Franken, pero tambe a haci cu si ta keda mas cu un cierto tempo AO, e trahado ta perde tur su placa di vakantie. “Placa chikito pa nos, pero pa nan niun medida.”

Astec a bin cu aumento ‘chiripero’

Diego de Cuba, presidente di STA tambe a presenta na waf di Barcadera pa expresa cu aunke gerencia di Astec a bin cu un aumento ‘chiripero’ (pichiri), nan a dicidi di para negociacion pa e CAO nobo den aña 2018. “Nan no a negocia, nan a dicta.”

Sr. de Cuba, señalando na e parkeerplaats di Astec unda tabatin varios truck para cu no tabata na altura di kico ta pasando, a expresa cu STA ta consciente cu ni e negoshinan ni e coredo di trucknan ta envolvi cu e asunto aki. Sinembargo e sindicalista a expresa cu ‘pa bo haci un statement bo tin cu sacrifica algo’.

Apelacion pa gobierno analisa contracto

Durante e accion cu a dura 2 ora STA a haci un apelacion pa gobierno di Aruba cuminsa analisa e contracto firma entre Astec y APA (Aruba Ports Authority) ‘tras di cortina’. “Mescos cu gobierno a haya nan mes confronta cu cantidad di sorpresa, STA tambe ta haya su mes cu cantidad di sorpresa. Awe mes mi a tende di e contracto di Citgo di 2000 pagina cu niun hende sa kico ta su contenido. Na 2018 nos kier un claridad riba kico e contracto entre Astec y APA ta encera pasobra e trahadonan ta esun cu ta sufri consecuencia.”

Accident siman pasa
Segun e trahadonan y sr. de Cuba siman pasa a pasa un accident ‘basta pisa’ na waf unda cu no tabatin ningun persona herida pero si a causa daño material bastante serio. Mientras e trahadonan ta expresa nan malcontento, segun sr. Dijkhoff, Astec ta pone un persona cu no ta certifica pa opera e grua pa opera esaki mientras e accionnan ta tuma luga. E trahadonan ta pidi pa Astec pone un persona certifica pa opera e grua mirando e accident cu a tuma luga.

Reaccion gerencia

Nos a papia tambe cu representante di gerencia Randall Angela kende ta manager di mantencion na Astec. Di Astec su banda nan ta haya cu e trahadonan ta den tur nan derecho pa tene un reunion durante e accion. Gerencia despues di algun tempo tabata sinta na mesa cu STA pa negocia un cambio di e CAO pero no a logra esaki pa fin di aña pasa. Segun sr. Angela a pospone e negociacionnan pa te despues di temporada di Pasco.

Pero pa Astec tambe ta importante pa haci cierto cambionan den e CAO mirando cu tin hopi cos cu a cambia na e waf. Di parti di e trahadonan tin un preocupacion cu ta kita cierto partinan di e CAO y ta pone esaki den un buki separa cual segun e trahadonan ta haci posibel pa Astec ‘sigui dicta’. Pa loke ta trata esaki sr. Angela a splica cu loke nan a haci no ta contra ley, y cu ‘e ta masha normal’ pa hopi compania.

Responsabilidad di Astec pa economia

Ora a move waf pa Barcadera, Astec a haya su mes cu hopi mas responsabilidad, cual segun nan ta bin cu mas compromiso financiero. Sr. Angela ta splica cu pa loke ta trata e contracto esaki a exigi cu Astec mester a forma parti di e financiamento, diseño y e mantencion. Esaki por compara na otro proyectonan PPP unda ta cera un contracto di Design Build Finance Maintain (DBFM). Gerencia ta splica cu parti di e contracto aki ta encera cu Astec ta responsabel pa waf pa un periodo di 25 aña.

“99% di nos carganan ta pasa via nos wafnan. E ta cay na nos pa sigura cu tur locual ta nos economia y nos turismo wordo manteni. Tin hopi stakeholders envolvi y p’esey nos mester ta cauteloso.”

Pa loke ta trata e certificacion di operado di grua, sr. Angela a splica cu e personal cu ta haci esaki ora e operadonan cu ta haci esaki diariamente no ta disponibel ta den proceso pa wordo certifica conhuntamente cu e tecniconan y e fabricante di grua.

Gerencia di Astec di su banda ta haya cu e pago cu e trahadonan ta haya ta apropia, mirando e manera con ora tin solicitud ta haya un acogida grandi cu sa di e beneficionan y salario segun nan. Es mas sr. Angela a expresa cu pa e loke ta trata e orario tin hopi biaha cu e trahadonan no mester produci. “Ora no tin barco nan no ta traha pero nos tin cu sigui paga di tur forma.”