E tipo di proyectonan manera e mercado na Flor Oriente cu ta tuma luga awe den pleno curason di Rancho, pero tambe e caminata of tour den Rancho ta yuda cambia e percepcion cu tin paden y pafo di e bario historico aki.
Tur hende ta consciente di e problematica social cu tin den Rancho. Pero e tipo di proyectonan aki tin un impacto psicologico faborabel pa nan habitantenan, y ta pone e bario aki den un spera mas positivo. Pa ehempel pa medio di e caminata den Rancho, nan ta laga te hasta e hendenan di e bario mes compronde kico ta nan historia, y historia di cierto monumentonan. E bario aki tin e dinamica semper cu hendenan nobo ta bay biba den dje.
E tipo di pedagogia of educacion aki ta den tur nivel fei muchanan, studiantenan y universitarionan. Universidad di Aruba (UA) ta cerca di Rancho y practicamente e ta haya cu nunca nan no tabatin e atencion pa locual ta tuma luga den su mesun area. Pero durante e ultimo cuater aña nan a bin cu un bon relacion di trabou cu UA, specialmente den e parti social y tambe den hospitalidad y diferente materia. Tambe tin studiantenan cu ta bin di afo pa intercambio academico. “Locual nan ta mira cu Rancho tin asina tanto cos pa ofrece”, segun presidente di fundacion Rancho, Clifford Rosa.
Academico
Segun sr. Rosa tin un aspecto academico cu tambe mester tene na cuenta. Hopi biaha nos tur por pensa riba problema social so. Un problema social cu por ta individual tambe. Sinembargo ora cu bo ta papia cu e individuo mes, e no ta haya cu e ta parti di un problema social. Pues pa e aspecto academico e bario aki a sufri di un desaroyo economico cu no a tene cuenta cu e impacto social.
E fundacion aki a purba trece dilanti pa nos tin mas consciencia riba con economia tin su impacto social. No tin ainda un estudio haci con ta wordo midi un impacto social. E parti negativo cu e mes cu a lanta den Rancho a sinti tempo di mucha, ta e stigma negativo cu a wordo crea. Ora bo ta bisa cu bo ta bin di Rancho, e ta crea un ambiente te hasta negativo cerca cierto hendenan.
Sinembargo e ta haya cu esaki no ta kita afo cu tin otro cosnan den bario cu si ta positivo. E aspecto aki e fundacion ta purba di hiba esaki na e comunidad di Rancho, entre otro pa medionan di actividad di arte y cultura, y e tipo di tour of caminata cu nan ta realisa cu mandatarionan, turistanan, studiantenan, etc..Esaki ta crea un dinamica positivo pa e habitantenan di Rancho, pero tambe pa esunnan cu ta bin bishita.
Segun sr. Rosa, for di inicio di 2010 cu e fundacion aki a wordo establece, nan ta bin trahando riba proyectonan cu por conserva historia y cultura di Rancho. “Pero tur esaki tambe ta bin bou un capa cu tin di haber cu un transformacion di Rancho.”
E transformacion aki no ta algo simpel mirando e complehidad cu tin den e desaroyo historico di e bario aki. Nan ta trahando pa documenta of re documenta hopi di e tipo di informacion aki y resalta locual tin como material intangibel y tangibel. Un aspecto tin di haber cu e edificionan monumental cu tin den e bario aki, kico nan tin pa ofrece pa yuda e fundacion y e bario mes pa engrandece cultura y historia di Rancho.
