Ayera tardi na Universidad di Aruba a tuma luga e acto simbolico caminda a haci traspaso oficial di e monumento di Maria Convent pa duna inicio na e renobacion di e edifico historico aki caminda lo ubica e facultad SISSTEM (Sustainable Island Solutions through Science, Technology, Engineering and Mathematics) di Universidad di Aruba.

Prome Minister, Evelyn Wever-Croes, Minister di Asuntonan Economico, Comunicacion y Desaroyo Sostenibel, Geoffrey Wever, Minister di Cultura y Finanzas, Xiomara Maduro y Minister di Enseñansa y Deporte, Endy Croes, conhuntamente cu representantenan di United Nations Development Program (UNDP), di e Delegacion di Comision Europeo (virtualmente) y di Universidad di Aruba tabata presente na Universidad di Aruba pa e evento aki. .

A traves di e Fondo di Desaroyo Europeo, e proyecto SISSTEM ta ricibi un financiamento di 13 miyon di euro pa realisa e proyecto den su totalidad. E facultad di SISSTEM na Universidad di Aruba, ta consisti di un programa di Bachelor den STEM, cu a cuminsa na 2019, un programa di Masters y un programa di investigacion di PhD cu lo enfoca ariba desaroyo sostenibel den Small Island Developing States (SIDS).

Sr. Gerardo Noto, UNDP Resident Representative pa Trinidad y Tobago, Aruba, Corsow, y Sint Maarten, presente na e acto, a indica con e proyecto aki ta cuadra y ta sostene local e UNDP ta representa y su obhetivonan.

“SISSTEM ta un iniciativa estrategico y ta un base fuerte pa e desaroyo y implementacion di iniciativanan relacion na tecnologia innovativo, recursonan renobabel, adpatacipn y mitigacion di cambio climatico,” Noto a remarca.

E facultad SISSTEM tin como obhetivo educa un generacion nobo di scientificonan y ingenieronan cu lo apoya sostenibilidad, diversifica economia local, reduci dependencia riba combustibel fossiel y mehora e habilidad di SIDS pa recupera di desasternan.

E facultad ta incorpora maneho di sostenibilidad riba nivel academico, mientras cu ta fortifica tambe e forsa laboral regional cu e habilidadnan y capacidad necesario. Ta spera cu e facultad di SISSTEM lo por bira un centro di excelencia y un centro di conocemento pa e region y pa SIDS rond mundo.

E establecimento di e facultad di SISSTEM ta financia door di Union Europeo y implementa pa UNDP den coordinacion cu Universidad di Aruba y Universidad Catolico di Leuven (KU Leuven) na Belgica.

Na juli 2019 Union Europeo a duna e tarea na United Nations Development Program (UNDP), como e partner pa implementa e renobacion di e monumento nacional Maria Convent y tambe pa e construccion di e laboratorionan pa facultad.

 

E prome periodo pa duna oferta a ser lansa dia 27 di november 2020 y dia 26 di februari 2021 a habri e ofertanan. E prome periodo pa pidi oferta no tabata exitoso pa motibo cu e prijs di material tabata hopi halto a causa di COVID-19 cu a afecta e cadena di oferta. Sinembargo, esaki no a stop e proceso y UNDP, hunto cu Universidad di Aruba a cuminsa tene na october 2021 un cantidad di reunionnan pa revisa e proyecto y haci e cambionan necesario pa reduci e proyecto y asina por a implementa e segundo periodo pa entrega oferta cu e presupuesto cu ta disponibel.

 

E segundo periodo pa entrega oferta a ser lansa na februari 2022 y aunke esaki tambe a tuma un proceso largo di negociacion, finalmente un contract a ser firma entre UNDP y ALBO Aruba N.V. pa completa e renobacion di e monumento Maria Convent.

 

Prome Minister, Wever Croes durante su discurso a ratifica e importancia di un nivel educacion halto den e formacion y desaroyo di hende pa asina por crea mas oportunidadnan pa un desaroyo economico resiliente.

 

Na mesun momento el a gradici e partnership cu e Union Europeo, ken haci e financiamento disponibel pa e desaroyo di e curriculum di e programa di bachelors oy masters, como tambe e programa di investigacion di PhD, den colaboracion cu universidad KU Leuven y pa e infrastructura fisico pa ubica e facultad SISSTEM.

 

“Mi kier expresa mi gratitud na e Comision Europeo pa kere den nos y pa haci e proyecto aki posibel. E creacion di e facultad SISSTEM ta un stap mas cerca pa pone Aruba ariba mapa mundial pa solucionnan sostenibel y nos ta gradici boso pa comparti e vision aki cu e Gobierno di Aruba,” Prome Minister a remarca.

 

Minister Geoffrey Wever a express durante su discurso cu como Minister di Desaroyo Sostenibel e ta kere cu ta esencial pa tin mas enfoke sostenibel moviendo pa dilanti, tumando den consideracion hende, e planeta y ganancia. “Pesey mi ta contento cu Universidad di Aruba ta enfoca den crea conocemento y capacidad pa e futuro doctornan,” el a subraya,

 

El a splica cu e expansion cu mas klas y oficina pa Universidad di Aruba ta un parti importante pa e desaroyo sostenibel di Aruba y e cooperacion cu e Union Europe a demostra durante añanan cu partnership ta importante pa logra solucionnan pa desafionan na caminda.

 

“Como Minister di Cultura mi ta hopi agradecido pasobra aworaki e monumento Maria Convent lo wordo renoba back na su gloria y e lo conta su storia, pasobra esey ta e magia tras di e restauracion di un monumento,” Minister Xiomara Maduro a indica.

 

El a sigui splica cu e edifico di Maria Convent a wordo construi na aña 1920 y e Dominican Zuster di Voorschoten a muda for di Hulanda pa e e edifico recien construi y na 1946 e prome piedra a wordo poni pa e kapel.

 

Den e añanan 50 tabatin aproximadamente 23 zuster bibando den e convento te na momento cu e convento a cera den añanan. E edifico a pasa over pa e Gobierno di Aruba y a wordo renoba na aña 1995 y despues di aña 1996 e edificio tabata hogar pa entre otro e Departamento di Cultura di Aruba, e Departamento di Asuntonan Exterio y hasta un tempo pa e Parlamento di Aruba.