Recientemente durante un conferencia di prensa minister di Husticia, Integracion y Transporte Publico, Arthur Dowers, a presenta un actualisacion amplio tocante e proceso di admision di persona na Aruba, cu enfasis riba e trayecto di “Hunto pa Progreso” cu a ser implementa aña pasa. El a comparti tambe cifranan oficial, evaluacion di resultado y tambe e reto cu gobierno ta confronta actualmente pa logra integracion efectivo di e grupo cu a participa den e proceso.

Segun e informacion presenta, e iniciativa “Hunto pa Progreso” tabata enfoca riba duna un oportunidad na personanan cu tabata biba na Aruba sin status legal pa regularisa nan situacion. E mandatario a indica cu a pesar di esfuersonan grandi pa comunica e oportunidad aki na comunidad, ainda tin un grupo significativo di persona cu, aunke nan por a cualifica pa aplica den e proceso aki, no a aplica pa drenta den e proceso.

Minister Dowers a indica cu aproximadamente 6.800 persona a entrega solicitud den e marco di “Hunto pa Progreso”. E grupo aki a ser dividi den dos categoria principal. E prome categoria ta consisti di 4.200 persona cu a logra obtene un permiso di estadia cu un dunador di trabao. E di dos grupo ta inclui 1.591 persona cu a haya un permiso temporal, pero sin un dunador di trabao asigna na momento di aprobacion.

El a splica cu e grupo di 4.200 persona cu tin dunador di trabao ta aworaki den e proceso regular di permiso y por sigui solicita permiso den futuro conforme cu e regulacionnan vigente. Esaki, segun e minister, ta indica un integracion relativamente exitoso di e grupo aki den mercado laboral formal.

Pa e di dos grupo di 1.591 persona, e situacion ta mas compleho. El a subraya cu desde inicio di e proceso a informa claramente cu esnan cu no tin un dunador di trabao lo ricibi un permiso temporal valido pa un periodo di un aña. Durante e periodo aki, nan tin responsabilidad pa busca empleo formal cu un dunador di trabao pa asina por transiciona pa un permiso regular. Sinembargo, e mandatario a enfatisa cu e permiso temporal aki no por ser renoba, locual ta nifica cu despues di e periodo stipula, e persona mester a cumpli cu e condicionnan pa por keda legalmente na Aruba.

Minister Dowers a sigui splica cu gobierno, via DIMAS, ta colabora activamente cu organisacion internacional IOM (Organisacion Internacional di Migracion) pa guia e grupo aki pa probecha oportunidadnan di empleo. E colaboracion aki tin como meta conecta persona cu dunadornan di trabao cu tin necesidad di empleado, contribuyendo asina na integracion economico di e migrantenan.

No obstante, minister Dowers a reconoce cu tin varios reto den e proceso. Segun su declaracion, tin caso unda persona ta ser invita pa entrevista of pa considera oportunidadnan di trabao, pero despues nan ta rechasa e opcionnan, indicando cu nan ta prefera sigui traha di forma independiente of informal. E mandatario a subraya cu gobierno no por obliga ningun hende pa acepta un trabao formal, pero a adverti claramente cu falta di participacion den e sistema regular lo tin consecuencianan.

E minister a indica cu a pesar di oportunidadnan ofreci, algun persona ta laga e chance pasa pa mehora nan situacion. Despues, e personanan tin tendencia pa presenta keho of argumenta cu nan tin derecho pa keda na Aruba debi na nan largo permanencia, pero sin a cumpli cu e proceso estableci.

“E periodo di acepta ilegalidad tin cu yega na su fin, y pa gobierno el a yega e fin na momento cu a anuncia e proceso di Hunto pa Progreso, un proceso cu ta duna oportunidad, pero cu ta duna tambe obligacion y responsabilidad,” el a enfatisa.

Den un intento pa aumenta participacion, gobierno a logra coopera cu alrededor di 15 compania cu a mustra disponibilidad pa contrata trahadornan for di e grupo aki. E iniciativa aki ta busca facilita e transicion di e personanan den mercado laboral formal. Sinembargo, e resultado actual no ta completamente conforme cu e expectativanan inicial.

A pesar di esaki, minister Dowers a expresa speransa cu e situacion lo mehora. El a indica cu, hunto cu e director di DIMAS y su ekipo, nan lo continua difundi informacion y motivando e grupo afecta pa haci uso di e oportunidadnan disponibel.

E importancia di integracion laboral tambe ta keda refleha den e necesidad pa trahador na Aruba. El a enfatisa cu tin demanda pa trahadornan den varios sector, y e grupo cu a participa den “Hunto pa Progreso” tin potencial pa contribui significantemente na economia. Sinembargo, si nan no probecha e oportunidad, otro personanan lo por ocupa e posicionnan disponibel.

El a indica cu gobierno ta trahando paralelamente riba un maneho nobo pa evalua necesidadnan di mercado laboral, den colaboracion cu Departamento di Labor. E meta ta determina cu tipo di trahadornan ta necesario pa e desaroyo di e pais, y con e oferta local y migratorio por adapta na e demanda aki.

Por ultimo minister Dowers a subraya cu despues cu e periodo actual pasa, gobierno lo cera e capitulo di “Hunto pa Progreso” y move pa un otro modelo di reclutamento. Esaki ta implica cu e grupo cu no logra regularisa nan situacion dentro di e termino estableci lo no tin oportunidad adicional pa permanencia legal na Aruba via e mesun trayecto.

E mandatario a pone enfasis riba e balansa entre oportunidad y responsabilidad, destacando e esfuerso di gobierno pa crea un sistema mas ordena y sostenibel pa migracion y integracion laboral na Aruba.