Acuerdo cu CITGO ta duna mas pregunta cu contesta,Tin acuerdo cu Rincón tambe?

editorial.jpg

Manera tabata di spera, practicamente bispo di Pasco gobierno a anuncia un acuerdo cu e compania CITGO, pa continua delibera riba e reapertura di e refineria, cu actualmente ta ainda propiedad di Valero. Remarcabel ta e entusiasmo y hubilo cu  a ser expresa, mientras cu ora bay analisa bon, ta hopi awa mester pasa bay banda di Aruba prome cu e refineria habri, si acaso esey sucede. Kico ta e situacion? A firma un acuerdo pa sigui delibera y concretisa e puntonan cu ta di importancia pa un acuerdo definitivo. Esey kier men cu e documento aki no ta mara ningun di e partidonan ainda. Pero si varios pregunta a surgi.

Ta tende cu CITGO no ta cumpra nada, no ta inverti nada, pero Aruba ta bay haya un refineria, bao di un compania local, 100% propiedad di Pais Aruba, cu ta bay rehabilita y renoba e refineria, pa despues lease esaki cu CITGO. Really? Nos mester bay hinca e pais aki den un aventura cu un refineria cu ningun compania di renombre internacional kier a mishi cun’e? Nos no tin ni un gobierno cu por run un gobierno, anto awor nan ta bay run un refineria? Unda un gobierno, cu tin por lo menos cinco biyon florin di debe, ta bay fia placa pa rehabilita un refineria?

Otro pregunta ta, si awor ta anuncia caba cu esaki ta bay tuma luga, pakico no ta transparente y mustra nos un acuerdo cu Valero, cu ta doño di henter e compleho? Kico ta e detayenan di e acuerdo ey, si acaso e ta existi? Valero ta dispuesto pa entrega tur cos, incluyendo e transshipment y e distribucion di combustibel na Aruba? Y esaki ta bay tuma luga pa un prijs simbolico, of Valero kier mira un prijs comercial pa e empresa? Asina leu cu nos conoce e acuerdonan cu tin, Valero ta obliga pa entrega e tereno limpi, sin refineria. Esaki lo significa cu Valero lo ta liber di cualkier obligacion den futuro pa loke ta limpieza o consecuencia ambiental, a base di e acuerdo aki?

Tur esaki nos no a tende, loke si nos a haya sa ta cu un compania ta dispuesto pa considera bin opera e refineria, si nos haci tur e inversionnan. Pero señores, lo boso referi na e caso di Curaçao cu a hereda un refineria pa un florin, y e ta funcionando ainda. Pero un hende mester tin basta curashi  pa compara un refineria completo manera di Curaçao, cu ta produci diesel y gasolin, entre otro, cu e instalacionnan manca di Aruba, cu tin mas di trinta aña sin haci esey. No, no, nan lo bisa, boso no ta comprende; nan ta bin solamente pa traha un ‘upgrader’ di e refineria aki. Of, miho dicho, nos mester bay inverti den transforma e refineria aki den un upgrader pa crudo pisa di Orinoco. Y nan ta bin sigur pa binti aña of mas, segun palabranan di nos Prome Ministro. Pero no ta conoci cu na Venezuela mes nan ta trahando riba construccion di mas upgrader cerca di e luga di  explotacion, y esey no ta bay tuma nan binti aña… Pareu nan no mester di e upgrader na Aruba mas, pasobra nan ta uza nan mes upgradernan den cas, nan a keda cla cu nos, toch? 

Banda di tur e preguntanan aki, ta remarcabel cu e deal a tuma luga exactamente na e momento cu un persona cu aparentemente tabata instrumental den e contactonan cu CITGO, a cay cera acusa di viola ley Mericano encuanto soborno paga na entre otro empleadonan di CITGO y PDVSA pa haya contractonan grandi di entrega di ekipo y material pa refineria. E persona aki tin propiedad na Aruba y tabata duna alohamento na Hugo Carvajal, busca pa autoridad Mericano pa labamento di placa. Tanto Carvajal como Rincón ta ser mira internacionalmente como personanan clave den e enrikeciendo ilegal di e Chavistanan, cu ta logra saca placa for di Venezuela pa sigura nan futuro pafo di nan mes pais. Na e momentonan aki no ta necesario pa bay specula kico exactamente ta o tabata e relacion di gobierno di Aruba cu Roberto Rincón den e asunto di e refineria aki. Time will tell. Y si acaso e idea tabata cu Rincón lo a bay inverti den e refineria di Aruba, ta duda cu for di prizon na Merca e lo haya e oportunidad pa haci esey. Un eventual condena casi sigur lo hiba tambe na e disolucion di su companianan envolvi, y naturalmente lo ta consehabel pa gobierno di Aruba keda leu di e tipo di hende aki.

Nos ta keda sinembargo cu e sabor amargo di e echo cu cada biaha nos gobernantenan tin un tremendo talento y olfato pa topa y ‘team up’ cu hende di reputacion dudoso, cu supuestamente ta bin como e gran Salvador pa haci nos un tremendo fabor. Nos sa cu e fabornan aki nunca ta pornada, after all nos ta papiando aki di hende di negoshi. Nos lo mira kico lo sali for di e caso na Merca.

You May Also Like

editorial 2_15_1.jpg

Hopi cos di drecha den sector medico: Pero hopi di nan ta manehabel…

E demostracion contra situacion den sector medico siman pasa sigur no a impresiona pa ...

editorial.jpg

Falta di cifra ta mata tur debate, Ki dia ta bay traha riba e problema aki?

Unda cu nos bay, unda nos bira, falta di cifra confiabel ta haci tur ...

Ley di telecomunicacion ta ‘outdated’

Ademas no ta atende mundo digital  A surgi algun conmocion tocante e carta cu ...

Un gobierno cu ta haci e cosnan ‘normal’

Sigur den e ultimo dos periodo di gobernacion, nos por a experimenta loke ta ...

Persecucion politico of persecucion penal…?

Den ultimo dianan tabatin extenso cobertura den prensa di e caso di detencion di ...

Rrelacion cu Venezuela… Kico haci cu Nicolas Maduro…

E siman aki cosnan importante lo ta tuma luga na e pais bisiña na ...