Investigacion nobo ta sugeri cu condicionnan namera sindroom di falta di atencion y hyperactividad (ADHD), desorden bipolar, of hasta comportamento agresivo por ta vincula cu consumo di sucu, y cu e por tin un base evolucionario.
E investigacion di Campus Medico Anschutz di Universidad di Colorado, publica den Evolution and Human Behaviour, ta presenta un hypothesis cu ta sostene e idea di un rol di fructose, un componente di sucu y high fructose corn syrup, un acido urico (un metabolite di fructose), den aumento di riesgo pa e desordennan di comportamento aki.
“Nos ta presenta evidencia cu fructose, door di reduci energia den celnan, ta duna impulso na un respuesta di ‘foraging’ (busca cuminda) similar na loke ta sucede cu hambruna”, segun autor lider, Richard Johnson, MD, un profesor na e Scol di Medicina di Universidad di Colorado na e campus medico CU Anschutz.
Johnson ta delinea investigacion cu ta mustra un respuesta di ‘foraging’ cu ta stimula toma di riesgo, impulsividad, buskeda di novedad, toma rapido di decision y agresividad pa yuda sigura cuminda como un respuesta di sobrevivencia. Sobre-activacion di e proceso aki door di consumo excesivo di sucu por causa comportamento impulsivo cu por varia di ADHD pa desorden bipolar of agresion.
“Mientras e mecanismo di fructose tabatin meta pa yuda sobrevivencia, consumo di fructose a aumenta excesivamente durante ultimo siglo y por ta den ‘overdrive’ pa motibo di e cantidad grandi di sucu cu tin actualmente den e dieta occidental”, Johnson ta agrega.
E documento ta evalua con consumo excesivo di fructose presente den sucu refina y high fructose corn syrup por tin un rol contribuidor den e pathogenesis di desordennan di comportamento cu ta asocia cu obesidad y e dieta accidental.
Johnson ta nota: “Nos no ta culpa comportamento agresivo riba sucu, sino ta nota cu e por ta un contribuidor.”
Johnson ta recomenda mas estudio pa investiga e rol di sucu y acido urico, specialmente cu inhibidornan di fructose nobo den horizonte. “E identificacion di fructose como factor di riesgo no ta elimina e importancia di factornan genetico, familiar, fisico, emocional y ambiental cu ta duna forma na salud mental”, el a agrega.
