Un adolescente di Florida, identifica como e ‘mastermind’ di un schema cu a haya control di cuentanan di Twitter di politico-, celebridad- y magnatenan di tecnologia prominente a declara inocencia ayera pa varios cargo di fraude.
Graham Ivan Clark, di 17 aña di edad, ta acusa di usa cuentanan horta di Twitter pa scam hende rond mundo pa mas di $100mil den Bitcoin.
E ta acusa di 17 cargo di fraude di comunicacion, 11 cargo di uso fraudulento di informacion personal, y un cargo di fraude di mas di $5mil y di haya acceso na computer of aparato electronico sin autoridad. E audiencia breve na Tampa a tuma luga via e servicio di video conferencia, Zoom.
Clark ta programa pa un audiencia di fiansa awe. E ta deteni na Hillsborough County Jail cu fiansa poni na $725mil, segun documentonan di corte.
Clark a keda aresta diabierna na Tampa, y oficina di Fiscal Estatal di Hillsborough ta enhuiciando e como un adulto, segun un comunicado di prensa.
Tambe a acusa otro dos homber den e caso. Mason Sheppard, di 19 aña di Bognor Regis, Reino Uni; y Nima Fazeli di 22 aña, di Orlando a wordo acusa separa siman pasa na un corte federal na California.
Como parti di e violacion di siguridad di perfil halto, a manda tweetnan falso dia 15 di juli for di e cuentanan di Barack Obama, Joe Biden, Mike Bloomberg y un cantidad di biyonarionan di tecnologia, incluyendo CEO di Amazon Jeff Bezos, co-fundador di Microsoft Bill Gates, y CEO di Tesla Elon Musk. Celebridadnan Kanye West y su esposa Kim Kardashian West tambe tabata victima di e hack.
E tweetnan tabata ofrece di manda $2mil pa cada $1mil manda na un adres di Bitcoin anonimo.
Documentonan den e casonan na California ta bisa cu Fazeli y Sheppard a negocia e benta di cuentanan di Twitter horta pa un hacker kende a identifica su mes como ‘Kirk’, bisando cu e por ‘reset, cambia y controla cualkier cuenta di Twitter cu kier’ a cambio di pagonan di cryptomoneda, bisando cu e tabata un empleado di Twitter.
E documentonan no ta specifica identidad real di Kirk, pero ta bisa cu e ta un adolescente siendo enhuicia den area di Tampa.
Twitter a bisa cu e hacker a haya acceso na un dashboard di e compania cu ta maneha cuentanan usando ingenieria social y smartphone spear-phishing pa obtene credencialnan di ‘un cantidad chikito’ di empleadonan di Twitter ‘pa haya acceso na nos sistemanan interno’. Spear-phishing ta usa e-mail of otro mensahe pa gaña persona pa comparti credencialnan di acceso.
Maske e caso tabata siendo investiga pa FBI y Departamento di Husticia Mericano, Fiscal Estatal di Hillsborough, Andrew Warren a bisa cu su oficina ta enhuiciando Clark den corte estatal pasobra ley di Florida ta permiti pa acusa menornan di edad como adulto pa casonan di fraude financiero ora esaki ta apropia. El a yama Clark e lider di e scam di hacking.
“E acusado ta biba aki na Tampa, a comete e crimen aki, y lo ta enhuicia aki”, Warren a bisa.
Clark ta representa pa abogado di Tampa, David Weisbrod.
Tata di Fazeli a bisa AP cu e ta 100% sigur cu su yiu ta inocente. “E ta un hopi bon persona, hopi honesto, hopi inteligente y leal”, Mohamad Fazeli a bisa. “Nos ta den shock mescos tur otro hende. Mi ta sigur esaki ta un kibocacion.”
