Bermudez.JPG
Actualmente personal di aduana ta cinta cu un mashin di scan so loke ta haci mas dificil ainda nan trabou di control  considerando cu nan capacidad di personal ta hopi limita, specialmente den e temporada di fiesta aki cu e presencia di bishitante di afo ta basta halto.
 
Minister di Finansa Angel Bermudez encarga cu e departamento di aduana ta declara na Bon Dia Aruba cu e ta consciente di e problema cu e personal di departamento aki ta pasando aden. E mandatario a laga sa cu nan ta trahando duro pa entre otro pa facilita e instrumentonan cu aduana mester traha cu esaki
.
“Ta asina berdad cu na aeropuerto un scanner mashin ta traha y e otro ta daña.” 
 
Segun minister Bermudez, den cuadro di renobacion cu aeropuerto ta contemplando aworaki den e sala di yegada di bishitantenan, tambe tin inclui dos mashin di scanner nobo cu ya caba a wordo pidi.
E mandatario ta kere cu na cuminsamento di aña binidero e personal di aduana staciona na aeropuerto lo por conta cu e dos scanner mashin nobo aki cu lo facilita substancialmente nan trabou. E mashin aki lo bin na man ora cu e renobacion di e sala di yegada di pasahero ta cla.
 
Waf di Barcadera
Tambe e mandatario Bermudez a referi na Bon Dia Aruba cu pa realisa un miho control nan a manda pidi un mashin di scan entre otro pa e waf chikito di Barcadera. Actualmente supervision y control visual so e personal di aduana tin, y nan lo desea di facilita e tipo di instrumento aki pa facilita nan trabou y realisa un miho control.
“Nos lo bin cu e scan mashin aki pa asina ey cuerpo Duanero por haci su trabou mas efectivo”, el a laga sa.