Aruba Fair Trade Authority (AFTA) ta investiga tres mercado cu tin impacto directo riba consumidor y economia di Aruba: transporte di container, mercado automobilistico y aplicacion di garantia riba airco. E investigacion ta forma parti di e temanan principal di AFTA pa 2026 y ta concentra tanto riba competencia como riba proteccion di consumidor. Den su rapport di e prome seis luna di 2026, AFTA ta indica cu ainda no tin conclusion definitivo, pero ta duna un bista di loke e ta investigando, progreso logra y e siguiente pasonan.

AFTA ta e autoridad independiente encarga cu supervision di bon funcionamento di mercado na Aruba, na beneficio di tanto e consumidor como di empresa. E por investiga mercado, interveni ora tin violacion di reglanan di competencia y duna conseho tocante cambionan cu por haci mercado funciona mihor.

Sinembargo, AFTA ta indica cu su capacidad ta limita y cu e ta ricibi mas notificacion cu e cantidad di investigacion cu e por inicia. Pa e motibo ey, e autoridad mester selecta entre e asuntonan cu e por investiga. Prioridad ta bay principalmente na mercado cu directa- of indirectamente tin impacto mas grandi riba bida di ciudadano promedio na Aruba. Cada aña AFTA ta publica un agenda cu e temanan cu lo haya prioridad.

Un di e investigacionnan cu por tin consecuencia importante pa economia local ta esun relaciona cu transporte di container pa Aruba. E estudio ta un continuacion di e investigacion di mercado di alimento cu AFTA a publica na september 2024.

Segun AFTA, e decision pa profundisa den e tema ta relaciona cu dependencia fuerte di Aruba riba importacion, importancia di e ruta di transporte for di Merca y señalnan for di mercado tocante costo di transporte cu ta halto y por fluctua considerablemente. Ademas, AFTA ta señala cu e ruta importante for di Merca ta ser opera pa un solo participante den mercado.

E investigacion no ta limita na prijs di manda un container pa Aruba. AFTA kier haya un bista completo di e structura di e mercado, diferente parti di cadena di transporte y e nivel di concentracion den cada fase. E autoridad ta analisa tambe desaroyo reciente den tarifa y relacionnan di competencia entre participante den sector.

Un aspecto importante ta determina si tin indicacion di conducta cu por limita competencia. AFTA ta verificando, entre otro, si por tin abuso di un posicion economico dominante of acuerdo prohibi entre participante den mercado, manera cartel. E rapport no ta indica cu AFTA a constata e tipo di practica aki; esaki ta un di e preguntanan cu e investigacion ta busca contesta.

AFTA kier uza e resultado di e estudio tambe pa formula recomendacion cu por mehora funcionamento di mercado di transporte di container y fortalece capacidad di Aruba pa enfrenta problema den e cadena di suministro.

Durante luna di januari te cu juni, AFTA a sigui cu su analisis, tene combersacion adicional y colecta mas dato pa haya un bista mas completo di e situacion. Na momento di preparacion di e rapport, e estudio tabata den fase di revision y publicacion di e conclusion y hallazgonan ta ser spera durante di tres kwartaal di 2026.

E di dos investigacion ta concentra riba garantia den benta di airco. AFTA a cuminsa e estudio na januari despues di señalnan cu aplicacion di garantia legal den e sector posiblemente no ta uniforme. Ademas, no tabatin suficiente informacion tocante con garantia ta ser aplica den practica ora un consumidor cumpra un airco.

Segun AFTA, airco ta un producto practicamente indispensabel den hopi hogar na Aruba pa motibo di e clima cayente. Cantidad di aparato pa hogar a aumenta significantemente durante ultimo decadanan, mientras friamento ta representa un parti importante di uzo di coriente den cas.

E investigacion tin como meta determina con garantia ta funciona den practica y te unda practica di empresanan ta cuadra cu reglanan legal. A base di e resultadonan, AFTA kier desaroya guianan pa promove un aplicacion mas uniforme y transparente di derecho di garantia den e sector.

Companianan di airco identifica a base di registracion di Camara di Comercio a ser acerca cu un encuesta tocante nan practica di garantia. E rapport ta señala cu e prome hallazgonan ta indica cu posiblemente tin diferencia den aplicacion di garantia legal entre companianan, algo cu segun AFTA ta hustifica continuacion di e investigacion.

Consumidornan tambe lo forma parti di e siguiente fase. AFTA ta prepara un encuesta pa conoce nan experiencia cu compra di airco. E resultadonan lo ser combina cu otro informacion colecta pa prepara guianan y, si ta necesario, recomendacion adicional pa e sector. E investigacion ta programa pa finalisa prome cu final di 2026.

Sector automobilistico ta e di tres mercado bao di investigacion. Durante prome mitar di 2026, AFTA a cuminsa prepara un estudio di e mercado despues di diferente notificacion cu e autoridad a ricibi durante 2025. E notificacionnan por ta relaciona tanto cu competencia como cu derecho di consumidor durante y despues di compra di un auto.

AFTA no ta menciona cua compania e notificacionnan ta toca ni ta detaye di cada caso. E estudio tin un alcance mas amplio y ta busca pa compronde funcionamento di mercado, experiencia di consumidor y desaroyonan relevante den sector automobilistico. E hallazgonan di e fase exploratorio lo forma e base pa determina direccion di e investigacion despues.

Den luna di mei, AFTA a cuminsa cu e investigacion preliminar. Un encuesta pa consumidor a ser prepara y distribui via rednan social. Personanan cu durante ultimo dos aña a cumpra un auto of a pasa door di mantencion di un vehiculo a ser invita pa comparti nan experiencia. AFTA a tene tambe combersacion cu diferente participante den mercado y a identifica otro stakeholder pa colecta mas informacion.

Segun e planificacion den e rapport, AFTA lo procesa e informacion colecta den un resumen interno di e hallazgonan. Resultado di e investigacion preliminar tabata programa pa ser discuti cu directiva di AFTA na final di augustus 2026. A base di esaki, e autoridad lo determina con e investigacion lo sigui y establece un planificacion nobo.

E tres investigacionnan ta concentra tanto riba bon funcionamento di competencia como riba proteccion di consumidor. Ainda no tin conclusion final: resultado tocante transporte di container ta spera durante di tres kwartaal, investigacion di garantia di airco ta programa pa finalisa prome cu final di aña, mientras e fase exploratorio den sector automobilistico lo determina con e estudio ey lo continua.