Agencia di biahe local hibando un lucha pa sobrevivi sin sosten di Ahata y ATA

Robert Bob Spellen

E agencianan di biahe ta pasando den un situacion nada facil pa varios aña debi na varios factor.

Robert Bob Spellen kende  ta doño y director di Discovery Travel a bisa cu ora cu nan a habri 27 aña pasa tabatin alrededor di 18 agencia di biahe di cual 16 di nan tabata miembro di IATA (International Air Transport Association). Actualmente tin apenas cuater agencia so miembro di  IATA cu ta practicamente sobreviviendo. Nan ta agencianan cu legitimamente  ta cumpli cu e areglonan stipula pa e asociacion aki y a base di esey agencia manera Discovery Travel ta operando.

E panorama di casi tres decada pasa pa e agencianan di biahe ta totalmente diferente na esun di awendia. Den principio e negoshi aki tabata hopi atractivo pasobra entre otro tabatin mas cooperacion di e companianan aereo. Tambe tabatin mas incentivo pa e agencianan di biahe ya cu tabatin miho comision paga pa e companianan aereo. For di eseynan nan tabata cubri nan gasto y nan por mantene stabiel nan negoshi.

Tampoco e apoyo di antes no t’ey mas di instancianan manera Ahata (representando industria turistico) y/of ATA (autoridad riba turismo) den un isla turistico manera Aruba. Tur agencia di biahe na Aruba ta ariba nan mes. E ta haya cu ta un cuestion di sinta y dialoga riba e situacion aki pa wak si nan por realisa cu mester apoya e agencianan di biahe local y acredita debidamente.

E ta premira cu si e situacion ta sigui asina denter di poco tur hende mester bay aeropuerto, y para den rij pa cumpra nan ticket cerca e compania aereo mes. Pasobra dificilmente e agencianan di biahe lo por sobrevivi di e forma aki.

Ambiente di turbulencia
Pero awor e realidad ta otro y diferente pa e agencianan di biahe. Mas of menos 15 aña pasa e companianan aereo a cuminsa baha e porcentahe di e comision te hasta kita e comision. Awendia e ta cero porciento den e mayoria di e compania aereo cu ta bulando. Practicamente niun di nan ta pagando un comision na e agencianan di biahe. Esaki a conduci cu e agencia di biahe mester busca un forma con pa sobrevivi. E unico manera ta esun di purba pa cobra un fee administrativo of booking fee cu mester mas of menos recompensa e diferencia cu e agencianan di biahe tabata ganando cu e comision di e compania aereo. Pero mayoria di companianan aereo no kier paga mas. Esaki a trece un ambiente di turbulencia y competencia cerca e gremio di agencianan di biahe local, ya cu cada un ta cobra un suma cu nan mes ta considera cu por draai nan negoshi.

E tempo ey nan a bin cu un  asociacion cu a purba di intermedia den esaki pa yega na un acuerdo pa tur agencia cobra e mesun fee. Pero e acuerdo nunca a wordo respeta ya cu nan ta yega na cierto palabracion, pero ora cu nan ta sali fei e reunion nan ta haci algo diferente.  Nan a purba di lanta e asociacion bek den diferente oportunidad, te hasta e aña aki mes nan a purba di bin bek cu ne. Pero ta un lastima cu e palabracion cu ta wordo haci no ta wordo cumpli despues.

Sinembargo sr, Spellen ta kere cu a pesar cu e agencia di biahe ta un negoshi cu tin su riesgonan grandi tin hopi hende cu ainda ta kere den dje. Discovery Travel ta un di e poco agencianan cu ainda ta miembro di IATA. No ta facil pa bira miembro di e asociacion aki ya cu tin exigencia hopi stricto cu e agencianan di biahe acredita pa nan, mester cumpli cu ne. Discovery Travel mes mester a tarda casi 5 aña prome cu nan a bira miembro di e asociacion aki.

Aceptacion di IATA
Si nan no ta cumpli cu un di e areglonan di IATA, e riesgo ta grandi cu e agencia di biahe por perde nan licencia cu ta e miho carta di garantia pa un cliente cumpra un ticket of un plan di biahe cu absoluto confiansa. “Kiermen nos tur ta purba di mantene nos mes den esey”, e ta bisa. Pero ta dificil pa nan por mantene na IASA door di exigencia cu ta halto y tur aña nan ta cambiando nan regla y nan ta birando mas.

Tin agencia cu a yega di lanta; pero nan no ta miembro di IATA, y nan a yega di comete te hasta fraude cu nan clientenan. Ta e caso cu departamento di Asunto di Consumido a denuncia recientemente di un agencia di biahe, esta Mas Destino cu a bende cantidad ticket falso. Esaki ta otro riesgo cu un consumido por pasa den dje.

Un agencia di biahe cu no ta miembro di IATA tin cu cumpra e ticketnan fei un agencia cu si ta miembro di IATA. Kiermen cu nan mester cumpli cu e reglanan stipula cu e agencia tin cu e compania aereo y cu IATA, entre otro cu e booking fee. Pues ta logico cu si pa e agencianan di biahe mes miembro di IATA ta duro; kico por spera pa esunnan cu no ta miembro y cu ta bira practicamente un intermediario. Pa tal motibo e tipo di agencia di biahe asina ta busca e manera mas barata cu sinceramente no ta existi, y pa tal motibo nan no ta cumpli.

Den e negoshi di agencia di biahe, e miembronan di IATA nan tur ta uzando e mesun inventario di e companianan aereo. E prijs ta mesun cos pa cada un di nan. Pues nan no por haci nada riba esey. E unico diferencia cu por tin ta e administrativo fee of booking fee. Pero door di e booking fee aki nan tin cu percura paga nan gastonan di operacion entre otro huur, servicio, empleado, etc..

Actualmente e booking fee ta 1% di e tarifa pa un vuelo pa Miami; esaki a base di e fee basico pa benta di ticket cu ta hopi mas abou cu e tax cu e biahero ta pagando pa cada ticket . Dificilmente un agencia di biahe cu no ta miembro di IATA por sobrevivi; solamente si nan ta bende ticket of pakete aereo ficticio.  Sr. Spellen ta bisa cu e ta haya un lastima cu ainda tin hendenan cu ta cay den situacion  asina no realisando esey. Ta recomendabel pa bay directamente na e oficina di benta di ticket di e compania aereo of bay na un agencia di biahe miembro di IATA.

Servicio y benta online
P’esey e poco miembronan di IATA cu ainda ta existi riba nos isla ta purba di cumpli cu nan  exigencianan. Tambe nan ta purba di atende cu tur e demanda of exigencia di nan clientenan cu ta e personanan cu nan tin cu duna danki ya cu nan por boek online, pero nan ta prefera e agencianan di biahe pa e servicio cu nan ta ofrece.

Como agencianan di biahe nan tin retonan grandi y nada facil, entre nan benta di ticket online cu Sr. Spellen ta considera como nan competido nan grandi. E-ticket  tin su acogida pero e riesgo ta hopi mas grandi cu si bo ta cumpra bo ticket directamente cu e agencia di biahe, e ta haya. Ya cu si online bo ta comete un fout chikito practicamente no tin solucion pe. Ya cu aunke por tin solucion, e caminda di cruz ta largo y hopi dificil. Ademas ta tarda hopi tempo pa bo por haya bek locual bo a paga via bo credit card. Igualmente e riesgo cu bo credit card ta wordo clone ta grandi tambe.

Esaki ta entre otro e gran diferencia y e garantia cu un agencia di biahe acredita pa IATA ta ofrece na nan cliente. Ya cu si pa ehempel e cliente ta perde su vuelo door di su fout of door di fout di e compania aereo, te hasta un fout cu e agencia di biahe mes por a haci, nan ta haci tur cos pa soluciona e problema. “P’esey nos t’ey.”

You May Also Like

Rudi Geerman FTA refineria y CAO.JPG

FTA ta mira cu reapertura di refineria ta riba papel pero nada den practica

– Ainda reapertura di refineria su efecto riba nos economia no ta wordo mira, ...

godzilla goby2.jpg

Godzilla descubri den awa di Aruba

Cientifico di Smithsonian Institution a descubri un sorto di pisca nobo den e parti sud ...

‘Hende cu ta traha demasiado no tin un desaroyo social’

Dia 7 y 8 di december venidero na Piedra Plat Entertainment Center ta bay ...

‘Regulacion riba cuenta off shore no ta nada nobo na Aruba’

E regulacion riba cuenta off shore no ta nada nobo na Aruba pa Venezuela ...

Gobierno kier traha cu TNO mas flexibel y menos costoso

ORANJESTAD – E instituto di investigacion TNO ta cera su portanan na Aruba. Prome ...