Organisacion Mundial di Salud (OMS) a declara e brote di un virus nobo na China, cu a plama na mas di un decena di pais, como un emergencia global ayera, despues cu e cantidad di caso a aumenta mas cu dies biaha den un siman.
E agencia di salud di ONU ta defini un emergencia internacional como un ‘evento extraordinario’ cu ta constitui un riesgo na otro pais y ta rekeri un respuesta internacional coordina.
China a informa OMS riba casonan di e virus nobo na fin di december. Te awo, China a reporta mas di 7,800 caso incluyendo 170 morto. Diesocho otro pais desde e tempo ey a reporta caso, mientras cientificonan ta lucha pa compronde exactamente con e virus ta transmiti y con severo e ta.
Expertonan ta bisa cu tin evidencia significativo cu e virus ta transmiti entre hende na China y a nota cu preocupacion casonan na otro pais unda tambe tin casonan aisla di transmision humano-pa-humano.
Papiando cu reportero na Geneva, director general di OMS, Tedros Adhanom Ghebreyesus a nota e transmision preocupante di e virus entre hende pafo di China. “Nos preocupacion ta e potencial pa e virus plama na paisnan cu sistemanan di salud mas debil cu no ta prepara pa deal cune. OMS tin confiansa den e capacidad di China pa controla e brote”
Un declaracion di emergencia global tipicamente ta trece mas placa y recurso, pero tambe por pone gobiernonan nervioso restringi biahe y comercio na paisnan afecta. E anuncio tambe ta impone mas rekisito pa reporta malesa riba paisnan. Sinembargo, Tedros a bisa cu OMS no ta recomendando limite riba biahe of comercio na China.
Specialistanan di brote ta worry cu e transmision di virus nobo for di pashent na trahadonan di salud por señala cu e virus ta adaptando na transmision humano. China a aumenta e cantidad di morto na 170 ayera, y mas pais a reporta infeccion, incluyendo algun transmision local.
Mientras tanto, Merca y Sur Korea a confirma nan prome caso di transmision persona-pa-persona. E homber na Merca ta casa cu un muhe di 60 aña cu a contrae e virus despues di bolbe for di un trip na Wuhan. E caso na Sur Korea tabata un homber di 56 aña kende tabatin contacto cu un pashent confirma di tin e virus.
Maske cientificonan ta spera di mira transmision limita entre hende cu contacto cercano, manera famia, instancianan di transmision di hende cu por tabata menos expuesto na e virus na Hapon y Alemania ta preocupante.
Un homber na Hapon a haya e virus trahando como chauffeur di bus pa dos grupo di turista di Wuhan. Na Alemania, un homber a bira malo despues cu un colega Chines di Shanghai, kende su mayornan recientemente a bishita Wuhan, a bin su oficina. Cuatro otro trahado na e mesun fabrica tambe a resulta infecta.
