OLYMPUS DIGITAL CAMERA

Ley riba servicio militar obligatorio lo keda modernisa

No tin mucho cambio den e agenda di ehecucion cu ta conta pa e di tres kwartaal, cu locual a firma October 1, 2021 entre Hulanda y Aruba.

Un biaha mas ambos a compromete cu ta sigui controla y maneha COVID-19. E tema di cuido ta un di e capitulonan importante den e landspakket cu ta condicion pa Aruba por a y sigui haya sosten di likides for di Hulanda.

A sigui e consehonan di e Outbreak Management Team, OMT pa por a maneha e capacidad di cama di ICU na Aruba, y tambe fortifica e servicionan di salud publico den sigui e desaroyo di COVID-19. Pero tambe a traha hunto pa percura cu e material di proteccion personal, PPE’s, y cu e capacidad di test tambe a keda na nivel y suficiente. Tambe a inicia un control di sindroma y a garantisa capacidad di air-ambulance, ademas cu a cumpra e vacuna contra COVID-19 y a ehecuta e programa di vacuna, na momento cu esaki tabata disponibel. Tur esaki tabata sosten di Hulanda.

Plan di reduccion di gasto

Pero pa baha gasto structuralmente, y den cuadro di efectividad, lo sigui pone riba mapa cua ta e duplicacion di mas di e oferta di cuido den e diferente institutonan y tambe pone otro ineficiencia riba papel, pa asina reduci esakinan. Hulanda ta enfatisa cu e hospitalnan den region di Reino Hulandes mester traha cu otro, y yega na palabracionnan administrativo. En todo caso esaki lo mester resulta den reduccion di e cantidad di hende cu ta bay den exterior pa tratamento medico, pa medio di ampliacion di e oferta di cuido den region di Caribe di Reino mes, unda e cuido di specialista ta halto. Hospitalnan tambe mester haci compra di material den conhunto, cu ta inclui remedi, medio, material y aparatura necesario.

 

Mester racionalisa cuido di laboratorio y reduci e cantidad di laboratorio priva y e specialistanan cu ta cay bao AZV mester drenta servicio di hospital. Hulanda kier un colaboracion mas fuerte entre e cuido di prome y di dos liña, ademas cu mester re-calcula e manera con determina e tarifa di pago. Esaki mester sucede a base di un palabracion entre AZV y e autoridad di cuido di Hulanda.

Ya caba a cuminza haci investigacion riba con pa desaroya y implementa efectividad y eficiencia di restructuracion di e servicio di cuido, y den e agenda di ehecucion ta papia atrobe di contribucion propio y evaluacion di e pakete basico di AZV. E tarea aki ta den man di Aruba y den e agenda di ehecucion no tin un fecha menciona. Pero, e recorte di 60 miyon ta un condicion pa haya e sosten di likides y aki ta College Aruba Financieel Toezicht, CAft ta conseha Gobierno di Reino.

Locual ta guia e implementacion di e medidanan aki ta e palabracionnan haci den e asina yama Vierlandenoverleg. Te ainda no a haci palabracion separa den e agenda di ehecucion.

Enseñansa

E meta riba tereno di enseñansa ta pa yega na un bon conexion entre enseñansa y mercado laboral, y un bon fluho entre structuranan di enseñansa, incluso cu institutonan na Hulanda. En corto, e reforma riba tereno di enseñansa ta pa realisa un calidad basico.

Ya caba un grupo di experto di e cuater pais a haci un revision di e sistema educativo, incluso di tur e actornan publico y particular (fundacionnan y scol publico). Locual a revisa ta e calidad di enseñansa, metodonan y medionan di les; conexion di enseñansa y mercado laboral, e fluho entre tur e nivelnan educativo, for di kleuter te scol secundario cu ta inclui EPB, EPI, MAVO, HAVO y VWO y estudio superior, incluso na Hulanda. A analisa e efectividad y eficiencia di e inversion den enseñansa y mitiga e ineficiencianan, ademas di fortifica e mehoracion di calidad mediante supervision efectivo pa medio di Inspeccion di Enseñansa. Tambe ta enfatisa colaboracion di institutonan educativo y di desaroyo den region y eventualmente cu Hulanda. Inspeccionnan di Enseñansa di tur cuater pais ta en todo caso envolvi den e proceso.

E rapport provisional cu recomendacion mester ta cla e siman aki, mientras cu e rapport final mester keda presenta na Maart 2022 y a base di e conclusionnan lo determina e siguiente pasonan.

Fortificacion Estado di Derecho

E meta di reforma ta pa contribui na fortifica e estado di derecho, entre otro, door di enfoca riba fortificacion riba control di frontera, bringa criminalidad economico/financiero y mehoracion di e sistema di detencion.

A dicidi, pa motibo di e urgencia pa stabilidad di orden publico y seguridad, cu no ta rekeri Aruba pa haci recorte den e capacidad di ehecucion operativo denter di mayoria di e sectornan mas vital pa estado di derecho. Esakinan ta Cuerpo Policial, Duana, Landesrecherche, Ministerio Publico, Corte, Wardacosta, Instituto Coreccional Aruba (KIA) y e servicio di seguridad. E reformanan ta continuando basa riba e investigacion di base cu a entrega riba 29 di Januari 2021 (e nulmeting).

Basa riba e investigacion aki y eventualmente otro investigacion lo keda determina si of con e sector di wega di placa, tanto fisico como digital, lo mester keda reforma. Obhetivo ta pa aumenta e entradanan di Gobierno. Lo tuma e decisionnan y implementa nan a base di e recomendacionnan. A trata e ley Supervision Wega di Placa y awor ta cuminza cu su implementacion, y Aruba lo haya asistencia tecnico den e kwartaal aki. E ta un trabao conhunto di Aruba y Hulanda.

Proteccion datonan personal

Tambe e paisnan lo traha riba un nivel harmonisa pa proteha datonan personal denter di Reino, pa medio di un rijkswet (ley na nivel di Reino). E plan di accion lo mester ta desaroya pa asina por implementa e pasonan den fase. E concepto di ley mester ta cla pa Januari 2022. Pero, no por exclui cu no por cumpli cu e fecha aki y como tal den e agenda di ehecucion a tene cuenta cu esaki y a bisa cu en todo caso e concepto di ley mester ta riba agenda di e Encuentro Husticial di Reino, e JVO, na Juli 2022.

Aruba a yega na un acuerdo cu Hulanda na Februari riba fortificacion di supervision di frontera cu a drenta na vigor dia 1 di April ultimo. E ta encera en todo caso riba e esfuerso, capacidad y administracion, control di commando di parti di Koninklijk Marechaussee, Duana y Wardacosta. E base di e protocol firma a cuminza implementa e palabracionnan. Segun e agenda di ehecucion ta asumi cu a determina caba e plan di accion, cu mester tabata cla pa 1 di October.

Fondo di criminalidad

Ta regla e maneho y supervision relacion cu e Fondo di Criminalidad. Aruba a apunta un instancia independiente cu ta controla e fondo riba cumplimento di recomendacionnan y ta raporta si e organisacion ta funciona bon. Esaki ta basa riba recomendacionnan di e Conseho pa Cumplimento di Ley. Pa 15 di December mester tin e formulacion cla pa cambia den e ley di Fondo di Bringa Criminalidad, of cambio di e ley mes. Lo discuti e concepto cu Corsou y St. Maarten.

Servicio militar obligatorio

Aruba, cu ayudo di Defensa Hulandes a presenta un plan di accion pa adapta e leynan di servicio militar obligatorio cu a bira bieu. E adaptacionnan ta necesario pa entre otro profesionalisa ARUMIL, unda entre otro ta busca forma pa e fluho di miembronan di e cuerpo militar Arubiano pa otro partner di seguridad nacional ta keda hancra. E ta inclui un plan di accion dirigi na profesionalisacion continuo di ARUMIL unda servicio obligatorio ta parti di dje. Aruba y Hulanda ta trahando riba actualisacion di e ley aki, y e trayecto di investigacion a cuminza memey di September ultimo. E fecha pa conclui e investigacion mester keda determina ainda.