‘Agricultura sostenibel pa nos come saludabel y rehabilita adicto’

Un cas tradicional blanco construi na 1923 cu un cunucu grandi situa na Alto Vista no ta mustra nada particular sino e storia su tras ta remarcabel. E ta conta di un entrepeneur social  cu no kier gana su placa sin duna algo bek na comunidad.

Momento di e entrevista e negociante aki, James Ocalia mes ta traha den ‘su’ cunucu cu un par di otro hende homber. Riba e cas blanco por lesa Cas Speransa Nobo, referiendo na e speransa cu nan kier duna nan ‘studiantenan’ cu ta sigui un programa di rehabilitacion.

“Nos ta yama nan studiantenan en bes di adictonan of clientenan. Pasobra nan a scoge pa siña un otro bida. Nan bida di adiccion ta den pasado awor y e meta ta pa siña y gradua den e bida nobo aki”, sr. Ocalia ta conta.

E ta splica cu e tin su negoshi Goshen cu ayudo di studiantenan. “Nan ta siña planta y e ta funciona den dos manera. Pa nan e ta algo cu nan por siña y pa haci tur dia. Pa mi e ta nifica cu mi por haci mi trabou y haci algo bon pa mi isla na mesun momento.”

E studiantenan trahando den e cunucu ta mustra nos cu hopi animo y orguyo kico nan a planta. Riba e 7000 m2 bo ta haya mas tanto concomber chikito, yambo, bonchi, pica. Pero tambe patia, dragon fruit y moringa. “Esakinan ainda no ta pa benta.” E studiantenan ta crece nan den un sorto di cuna pa ora nan ta mas grandi, planta nan den e cunucu. “Te awor nos ta bende solamente na esunnan cu ta bin na e cas. Esey ta bay hopi bon. Pero den futuro nos kier cuminsa bende tambe na supermercado y hotel.”

Tur dia sr. Ocalia ta traha cu su team di 1 pa 5’or di atardi. “ Dos di nan ta ariba 50 aña. Pa mi mes e ta intensivo pasobra e ta e prome biaha cu mi ta traha hunto cu adictonan. Mi a cuminsa cu e team aki dos siman pasa y ya ma siña cu mi mester ta stricto y cla. Nan mira bida diferente pues esaki ta siña nan bida mescos cu bo ta haci cu mucha.”
HopeAruba
E programa di rehabilitacion a cay bou di HopeAruba cual ta un plataforma nacional pa Civic Synergy. Nan a cuminsa cu e proyecto aki dos luna pasa. E pareha Shannon y Shawn Blankenship di e programa aki a bin for di Merca pa biba aki hunto cu nan yiu. Nan ta biba den cas mes y trahando segun e programa Teen Challenge.

Sr. Ocalia ta splica: “Nan ta aki pa un aña pa haci e programa y screen tambe e participantenan.”

Haci e diferencia

E entrepeneur social ta bisa cu e mes kier haci un diferencia pa su isla cu su pasion cual ta agricultura sostenibel. “ Mi meta ta pa e hende local lo come e berduranan tipico di aki y asina come mas saludabel.” Sr. Ocalia tin un pasion pa fruta y berdura local desde cu e tabata mucha. “Mi a skirbi e buki riba cuminda di Corsou y Aruba y puntra mi wela pa recetanan pa traha cuminda cu e berduranan local.” E a haya cu nos mester haci un esfuerso pa come nan mas. “Italiano tin nan zucchini y tomati. Aruba tin su concomber chikito y yambo. Nos generacion nos sa mes con mester cushina nos berduranan local mientrastanto nos si por cushina Italiano of cuminda di otro pais. Pero e ora unda nos cultura ta keda?”

Mas informacion riba Cas Speransa Nobo por haya riba Facebook: Goshen Sustainable Development Corporation VBA.

You May Also Like

IMG_9306.JPG

Presidente nobo di parlamento Mervin Wyatt Ras: ‘No por satisface tur hende’

“Nos sistema democratico ta asina, unda mayoria semper lo tin e poder pa dicidi.  ...

Bureau Rampenbestrijding a tene training di tsunami

Ayera mainta a tuma luga e training di tsunami aki na nos isla bou ...

dep higiena control y pasco.jpg

Bastante localidad no tin nan carchi di salud na ordo

Diabierna ultimo dos restaurant den centro di ciudad a wordo cera temporalmente, pa falta ...

6,8 miyon mensual pa ricibi 500 refugiado na Aruba

“Nos ta prepara, pero no cla.” Esey hefe di Departamento di Calamidad (Bureau Rampenbestrijding) ...

A2 candela (1).jpg

Serlimar: No por pone cura ainda pasobra destino Parkietenbos no ta cla

Causa di e candela di ayera mainta na dump di Parkietenbos ta mustra di ...