Asina a señala CEO di Aruba Hotel & Tourism Association (AHATA) Tisa Lasorte mediante un entrevista cortico cu redactor di Bon Dia Aruba tocante kico ta e prediccion cu AHATA tin pa proximo aña.
Ley di Impuesto a yega na Parlamento di Aruba dia 29 di november ultimo y esey pa AHATA ta bon pa motibo cu awor nan si por haya sa kico Gobierno di Aruba ta propone.
Igualmente, LaSorte a splica cu “ta falta pa aclaria hopi di loke nos ta mira den e texto, pa ta sigur nos ta compronde bon kico ta e intencion. Lo ta preferibel pa tin e transparencia di banda di gobierno pa ofrece informacion na gremionan pa tin claridad completo riba kico ta e plan pa 1 Januari”.
“Ademas, nos ta spera cu Parlamento ta responsabel den analisa e consecuencia di e medidanan di impuesto, y cu ta scucha nos. E preocupacion mas grandi ta cuanto costo di operacion ta subi pa companianan, y cu pa turista Aruba lo bira hopi mas caro mientras cu nos economia ta depende riba turismo”.
Pa 2023, LaSorte a señala cu nan tin preocupacion serio pa:
Cuanto Aruba lo costa pa turista?
Cuanto Aruba lo costa pa residente?
Cu gobierno, Utilities N.V, WEB, y Elmar lo en berdad baha e tarifanan di utilidad bek na Januari 2023, manera nan a priminti dia a hisa tarifa e aña aki?
Pero, no ta AHATA e unico instancia cu ta preocupa pa loke ta trata reforma fiscal, Aruba Trade Association (ATIA) tambe a duna di conoce den un comunicado di dia 29 di november cu 1 di januari e ley fiscal nobo mester drenta na vigor pero nan tampoco ta sinti cu tin claridad di kico e ley aki ta bin cune.
Nan ta prefera un reforma fiscal total pa un sistema di BTW debi cu un sistema fiscal ta mas amplio, simpel y ta regula su mes, esey lo tin mas beneficio pa Aruba.
